Shillong, Naiwieng 03: Ka seng Hynniewtrep National Youth Movement (HNYM) hynne ka sngi palei, kala pynbna ban weng shwa iaka jingleit shong kyllaiñ mungor hakhmat ka khyrdop Secretetiat kaba la buh ban pynlong ha ka 4 bad 7 tarik Naiwieng 2022.
Ia kane la pynbna da u President ka seng bah Louis Dohtdong bad ula ong baka seng kan pynlong noh ia kane ka jingiakhih naduh 8 tarik mynta u bnai lada ka sorkar ka dang leh mynthi halor ka jingdawa thaw policy thungkam ba 80% iaki samla trai jylla ha ki kompeni shimet.
Haba kren sha ki lad pathai khubor u bah Louis Dohtong u la iathuh ba ka daw bala pynsangeh noh shwa iaka jingiakhih haka 4 bad 7 tarik Naiwieng kadei namar ka seng kala ioh pdiang ia ka shithi naka ophis u Myntri Rangbah ka jylla bala khot ban iakren iaka seng haka 8 tarik mynta u bnai.
“Katkum ka shithi, u Myntri Rangbah ula khot iakren ia ngi haka 8 tarik mynta u bnai bad ka seng ruh kan ap shwa iaka jingiakren bad hadien ka jingiakren ka seng kan sa pynbna ia ka sienjam ba kan shim” la ong u bah Louis.
U bah Louis u la iathuh ba ki bor pyniaid district ruh kila bthah iaka ka seng ba kan pan jingbit naka ophis DC hynrei ka seng kala kren da kaba ba shai ba kam donkam ban pan jingbit namar ka kwah kynduh ia u Myntri Rangbah ban iakren markhmat.
