Shillong, Naitung 17: Ka Iingdorbar Parliament ka Ri India, kala pynrung ia ka kyrteng u Khla Wait ka Jaidbynriew u Tirot Sing Syiem ha ka thup jong ki Nongiakhun laitluid ka Ri India.
Ia kane la pyntip da u MP ka Rajya Sabha Dr W.R Kharlukhi ha ka jingialang kynmaw burom ia ka lyngkhuh sngi iap ba 187 snem jong u Tirot Sing ba long hynne ka sngi U Blei ha Hima Nongkhlaw.
“Ka Iingdorbar Parliament kala shna mynta ia ka thup kyrteng jong ki Nongiakhun laitluid ka Ri India bad u Tirot Sing Syiem udei uwei napdeng ki 115 ngut ki Nongiakhun laitluid ban kynthup ha kane ka thup kyrteng” ong u Dr Kharlukhi.
Ia kane ka jingialang kynmaw burom la pynlong da ka Tirot Sing Death Anniversary Committee ka Hima Nongkhaw ha ka jingiatreilang bad ka Centre for Historical Research ka Synod College (CHRSC), Shillong.
Une u MP ka Jylla ula ong ba lynkhuh sngi iap u Tirot Singh ka dei kaba hap ban kynmaw bad rakhe ha man ki jaka jong ka Jylla namar u dei uwei u riewshlur uba la iakhun bad len iala ka jingim naka jingbynta ka jinglaitluid ka Jylla bad ka Ri.
“Lada ki paidbah kim burom bad kynmaw ia une u Nongiakhun Laitluid ka Jylla, nga artatien baka pateng ban wan jong ka Jaidbynriew Khasi bad Jaintia kin kynmaw burom ia u” ula ong haba bynrap “Wat pynlong ia u Tirot Sing tang kum u briew ba shu iathuh khana, ai ruh ka burom kaba khraw eh ia u”.
I Kong Amina N Passah, Professor ka NEHU ila pyntip ba u Tirot Sing Syiem, wata u don ka jinganna ha kawei na ka kti jong u, hynrei kane kam shym la khang lynti ia u ban long uwei na ki nongiakhun laitluid ba khraw eh.
Ine I Professor ila kyntu ia ki samla pule ba kim dei ban shu shong kti kti hynrei ban pule bad tip shaphang ka Histori jong ka Ri-lum Khasi Jaintia, ki nongiakhun laitluid bad ruh ban tip ia ka hok jong ki “Ba ngin long ki trai hala ka jong ka jaka bad ka Jaidbynriew Khasi kaba ngi im”.
Ha kane ka sngi, ka Tirot Sing Death Anniversary Committee Hima Nongkhlaw, kala aiti ia ka dorkhas ha u MP ka Rajya Sabha ba tyrwa ban shna ia u motdur sahnam ba shirynieng bad ka Park ki Khynnah (Childrens Park) ban kynmaw burom ia une u riewshlur bym iap shuh jong ka Jaidbynriew, u Tirot Sing Syiem.
