Aizawl, Nailur 28 : Ka Election Commission of India (ECI) kala pynrung ia kumba 5,600 ngut ki jaidbynriew Bru kiba dei ki trai shnong kiba la sakma na Mizoram kum ki nongthep vote ba pura ha Tripura hadien bala pynkynriah biang ia ki sha ki jaka ba marjan ka jylla, kaba long ruh katkum ka jingiasoi soskular ba la ia soi ha u bnai Kyllalyngkot 2020, ong ka khubor heh sorkar hynnin ka sngi ba Ar.
Kane ka jingpynrung kyrteng ia ki jaidbynriew Bru kiba dei tynrai na Mizoram bad kiba la wan shong riehtngen ha Tripura naduh ka snem 1997 bad ia kiba ki jaka shong jaka sah jong ki la pynskhem ha ki bynta ba marjan ka jylla namar kila pulom ban leitphai shapoh Mizoram ha ka por ka jingpynkynriah ia ki.
Na ka liang u joint Chief Electoral Officer ka Mizoram u David Liansanglura Pachuau ula ong ba ia ki kyrteng jong ki 1,594 ngut ki nongthep vote na ki jaidbynriew Bru na ki khyndai tylli ki assembly constituency na ki 5,600 la weng noh na ka list thep vote jong ka Mizoram hadien ka jingkyrpad ban weng noh ia ki kyrteng jong ki na ka tnat pyniaid ilekshon ka sorkar Tripura.
Napdeng ki 1,594 ngut ia ki kyrteng jong ki 93 ngut ki nongthep vote kiba dei ki Bru la pyndam noh na ka list ki nong thep vote ka jylla hadien ba la bishar bniah ia ki form ba la ioh pdaing na ka sorkar Tripura,, ong u Pachuau.
Ula ong ruh ba ia ka tynrai kaba iadei bad ki jaka shong jaka sah jong kine ki 93 ngut ki nongthep vote kiba dei ki Bru ym shym la lapdien da ka tnat ilekshon ka Tripura, bad kumta ka jingpyndam noh ia ki kyrteng na ka list ki nongthep vote ka Mizoram la leh hadien ba la bishar bniah da ka tnat ilekshon ka Mizoram.
Ki kyrteng jong ki nongthep vote kiba dei ki bru ia kiba la weng noh na ka list ki nongthep vote ha Mizoram ki kynthup ia ki 1,379 ngut kiba dei na ki laitylli ki constituency kiba don ha khappud ka Tripura hapoh Mamit district, 187 na ki laitylli ki constituency kiba don ha khappud ka Assam hapoh Kolasib district bad 28 ngut kiwei pt na ki laitylli ki constituency kiba don ha Lunglei district ha khappud ka Bangladesh, ong utei u heh sorkar.
U Pachuau ula ong ruh ba ia ki kyrteng jong kine ki nongthep vote kiba dei ki Bru yn weng noh na ka list ki nongthep vote ka jylla hadien ba ki kyrteng jong ki kin mih paw hapoh ka Electoral Roll Officer Net (ERONet).
Haba pynpaw halor ka jingsuki ban pyndam noh ia ki kyrteng jong ki namar kiba bun ki daw, une u heh sorkar ula kyntu ia ka sorkar Tripura ba kin pynkloi ha kaba iadei bad kane ka bynta.
Katkum ka tnat ilekshon ka Mizoram kila don haduh kumba 11,759 ki nongthep vote kiba dei ki jaidbynriew Bru, kata kaba kynthup ia 5,751 ki kynthei, kiba la ioh lad ban wan shong wan sah biang ha Tripura kiba don kyrteng ha ka list ki nongthep vote hapoh Mizoram.
Ki tyllong khubor na Tripura kila ong ba ka jingpynkhreh ban pynkynriah ia kumba 35,000 ngut ki nongthep vote kiba dei ki jaidbynriew Bru kala iaid shakhmat.
Da ki hajar ngut ki nongthep vote kiba dei ki jaidbynriew Bru kila phet krad noh sha Tripura hadien ba kala mih ka jingiakynad jaidbynriew kaba la mih na ka jingshah pyniap jong uwei u heh ka tnat Forest ka Mizoram ha ki lehnoh Bru ha ka snem 1997.Naduh katei ka por kila hap ban shong ban sah ha ki ktem sah shipor mynta lah palat arphew snem kynthih.
Ka jingpyrshang pynkynriah ha ka sien kaba nyngkong ha u bnai Naiwieng 2009 ym tang ba kala pulom noh hadien ka jingshah pyniap jong uwei u nongshong shnong uba dei u Mizo ha ki lehnoh Bru, hynrei kala pynmih ruh sa kawei pat ka jingpynkylla phetwir.
Na ka liang ka sorkar pdeng bad ka sorkar Mizoram bad Tripura kila pyrshang haduh khyndai wat ban pynkynriah ia ki jaidbynriew Bru na Tripura hadpeng jong ka snem 2009 abd 2019.
Ha ka 16 tarik u Kyllalyngkot 2020, ka sorkar pdeng kynthup ia ka sorkar Mizoram bad Tripura nalor ki nongmihkhmat na ki kynhun seng jong ki jaidbynriew Bru kila iasoi ia ka jingiamynjur, ha kaba ia kumba 35,000 ngut ki trai shnong Bru kiba la sakma bad kiba la pulom ban leitphai sha Mizoram ha ka por jong ka jingpynkynriah la shah ba kin shong kin sah junom hapoh Tripura.
