Shillong Nailur 27: U President ka Voice of the People Party (VPP) Bah Ardent Miller Basaiawmoit hynne ka sngi ba-ar, u la pynrem jur ia ka jingkren jong u Nongialam ka Rashtriya Swayamsevak Sang (RSS) u Mohan Bhagwat uba la ong, “baroh kiba sah ha ka ri India (Bharat) ki dei ki Hindu”.
“U Bhagawat, nyngkong eh u kwah ban pynpaw ba ki riewlum jong ka jylla ki dei ki Hindu bad la pynkylla Khristan noh iaki. Ka ba ar, u pyrshang ban pynpait bad pynphiah hapdeng ki riewlum lyngba ka jingkren ka jong u. Ka balai, u pyrshang ban pynkohnguh ia ki paid riewlum jong ka jylla ba ka rukom ngeit tynrai ka jong ki kam iapher naka niam Hindu” ong u Bah Ardent.
U Bah Ardent ula ong ba ki nongshongshnong ka Jylla kim dei ban keiñ sting iaka jingkren jong u bad ka long kaba donkam ia ki paid riewlum ba kidei ban long kiba husiar bad kim dei ban shah ialam bakla ha kum kitei ki jingkren ki bym don nongrim ne shongnia.
“Dei ban kynmaw ba hashwa ka jingwan ka niam Khristan, ki paidbah riewlum ki ju bud ia ka jingngeit tynrai bad kane ka pher bak-la-bak naka niam Hindu” ula ong.
“Ki paidbah riewlum ki mane ia u Blei uba im bad kim dei satia kiba mane Bleithaw, kumta yn ym lah da lei lei ruh ban mutdur ne ban ianujor iaka jingngeit tynrai jong ki riewlum bad ka niam Hindu” bynrap une u nongialam ka VPP.
U Bah Ardent ula ong “Ma nga ialade kum u Khristan, ngam ju kam ba ka jylla Meghalaya kadei ka jylla jong ki Khristan namar ka jingngeit ne ka niam kadei ka jingsngew shimet shimet bad kam don bynta eiei bad ka jylla ne ka imlang sahlang”.
Ula ong ruh ba ka long ka bym iahap katkum ka riti synshar ka ri ban kam ba ka jylla Meghalaya ka dei ka jylla Khristan ne ka India kadei ka ri jong ki Hindu.
“Kumta ngi dei ban pyrshah jur ia kano kano ka jingthmu ban pyniaphiah ia ka imlang sahlang ha ka kyrteng jongka niam bad ngim dei ban iapeit iwei ia iwei ha ka jinglong niam hynrei ngin ia trei naka bynta ban pynneh iaka jingiatylli jong kane ka ri kaba khraw ka jong ngi” ong u Bah Ardent.
