Shillong, Lber 28 : Ka Shillong Press Club ha ka sngi palei ka la pynrem jur ia ka jingkem bad ka jingkem biang sa shisien ia u Assistant General Secretary ka Guwahati Press Club, Dilwar Hussain Mozumder ha ki pulit ka Assam.
“Ka jing kem biang ïa u mardor hadien ba la ai jamin ïa u kam dei tang kaba pynkhuslai jur hynrei ka dei ruh ka jing pyndonkam bakla ïa ka lynti ka aiñ kaba pynkyndit ia baroh. Kine ki kam ki pyni ia ka jingthombor beit beit ia ka jinglait luid ki nongpathai khubor bad ka hok tynrai ban pynpaw laitluid ia kaei kaba ki sngew. Ngi ieng da ka jingïatylli kaba khlem artatien bad u Mozumder bad ngi dawa ban pyllait noh mardor ïa u khlem da buh kyndon,” ong u President ka SPC bah DL Siangshai ha ka kyrwoh.
U la ong ba ha ka imlang sahlang kaba synshar paidbah, ki lad pathai khubor ki don ia ka bynta kaba kongsan ban pynthikna ia ka jingshai, ka jingkitkhlieh, bad ka jingtuid laitluid jong ki jingtip. Ka jingpyrshang ban pynduh ia kane ka bynta lyngba ka jingpynbor bad jingpyntieng kam long kaba lah ban pdiang bad dei ban pyrshah jur ia ka.
“Ngi kyntu ia ki bor synshar ban pynneh ia ka synshar ain, ban burom ia ka jinglong laitluid jong ki kot khubor, bad ban iada ia ka hok bad ka burom jong ki nongpathai khubor.Kum kine ki buit pynthut ki dei ban sangeh noh lada ngi kwah ban pynneh pynsah ia ki jinglong synshar paidbah kiba la pruid dak ha ka Riti Synshar jong ngi,” u la pynkut.
