Shillong, Risaw 12: Ki nongialam ka Raid Nongskhen, ka dorbar shnong Nongskhen bad Mawdang hynne ka sngi kila pynrem iaka kong Sahittina Iawim bad ia 2 ngut ki paralok jong ka daka ba kynnoh ba kila iaid lait iaki bor shnong halor ka jingjia kaba la jia haka janmiet jong ka 8 tarik mynta u bnai.
Haba kren sha ki lad pathai khubor u rangbah shnong ka shnong Nongskhen bah Thombor Marbaniang ula iathuh ba ka jingjia ha Raid Nongskhen kam hap haka shnong Nongskhen bad ula kynnoh ba kane ka jingjia kam dei kaba la heh haduh katta katta kumba la kynnoh daka kong Sahittina.
U bah Thombor ula ong ba haka jingshisha ka kong Sahittna kala dei ban pyntip mardor ia kaei kaba jia sha ki nongialam shnong namar ka shnong ka don iala ka bor ban leh pyrshah ia ki briew kiba thmu ban thombor ne pynkulmar shnong hashuwa ban ujor syndon daka Case ia kito kiba la paw ba shoh ia u paralok jong ka.
Ula ong ba ki rangbah shnong kidei kiba peit iaka shong suk shong shngain bad naka liang kane ka longkmie ka khlem pyntip satia shaki bor shnong hynrei kala kynnoh pynban ba ki nongialam shnong ki khlem ai jingiarap iaka bad ia u paralok jong ka.
“Kumno ka dorbar shnong kan mih ban tuklar iaka jingiakajia haba kane ka longkmie bad u paralok jong ka kila kyntait mardor ban pyntip shaka bor shnong. Mynta kane ka jingjia kala poi haki bor Pulit. Ngin ieh haka bor jong ka ain ban leh iaka ban donkam” la ong u bah Thombor.
U bah Thombor ula ong ba ki rangbah shnong jong baroh artylli ki shnong kim tip eiei halor kato ka jingjia kaba la jia haka 8 tarik mynta u bnai hynrei dei tad haka step jong ka 9 tarik kila tip hadien bala ioh Phone na ki Pulit jong ka Thanat.
“Ngi don iaki kyndon ban leh pyrshah ia kino kino kiba pynkulmar shnong ne kiba ktah kti iaki para shnong hynrei kumno ka bor shnong kan tuklar haba kiba ngat haka jingshah shoh haki suba buaid kim pyntip eiei shaki nongialam shnong” ula ong.
