Shillong, Lber 01: Ka Mawlai SC kala nang jam ha kaban iohrah ia ka nam lahduh jong ka OC Blue Shillong Premier League 2024 hadien ba kala pynrem ia ka Nongthymmai SC da 6-1 ha ka jingialehkai kaba la long hynne ka sngi Saitjain ha SSA Stadium, First Ground, Polo.
Mar ia sdang ka jingiakhun ha ka kylla step, ka Nongthymmai kala ioh thep ia ka kol ha ka minit kaba 12 lyngba u Pynshailang Kharduid, ka Mawlai kaba donkam ban jop ia kane ka jingiakhun ban iohrah ia ka nam lahduh, kam shym la duh jingkyrmen hynrei ki rangialehkai ki jongka kila bteng ban iakhun tyngeh bad ha ka minit kaba 27 ka Mawlai kala ioh thep ia ka kol lyngba u Donlad Diengdoh bad ha ka minit kaba 34 u Robertson Khongriah ula ioh thep ia ka kol na ka bynta ka Mawlai.
Ka Mawlai kala nang ioh mynsiem bad mar ia sdang ka jingiakhun ha ka kylla miet, u Banskhemlang Mawlong ula thep ia ka kol ha ka 51 minit, u Baiaikara Swer ula thep ia ka kol ha ka 76 minit bad u Romarius Laban ula thep ia ka kol ha ka 86 bad 87 minit.
Kane ka jingjop kala pynlong ia ka Mawlai ban ioh khur 44 point bad ban tam da 5 point ia ka Shillong Lajong FC kaba bat iaka kyrdan ka baar bad kine ki ar tylli ki kynhun ki dang sah ban iakhun sa mar arsien kaba kynthup ruh iaka jingialehkai hapdeng para ma ki.
Ka Mawlai ha ka taiew ban wan kan iakhun pyrshah ia ka Laitkor SC bad lada ka jop ia kane ka jingiakhun kala thikna ban iohrah laisien lynter ia ka nam lahduh jongka OC Blue SPL bad ban thaw histori.
Ka Nongthymmai, kaba la mad ia ka jingrem kala neh ha ka kyrdan kaba 9 hynrei haba kala ioh ban thep ia ka kol nyngkong eh kala pynkhynniuh ia ki rangialehkai ka Mawlai.
Ha ka sngi Nyngkong, ka Nangkiew Irat SC kan iakhun pyrshah ia ka Ryntih FC ha ka por 3 baje mynsngi. Ka Nangkiew Irat kala jop da 1-0 ia ka Ryntih ha ka jingiakhun kaba la long ha u bnai Nohprah 2024.
