Shillong Nohprah 21: Ka Khasi Jaintia Christian Leaders Forum (KJCLF) hynne ka sngi kala pynpaw iaka jingsngewsih halor ka jingshah thombor ki riewngeit Khristan ha ka jylla Chhattisgarh bad ki sngewthuh bha iaka jingeh bad jingshah pynshitom ka jongki ha ka lynti ka bym dei bad kaba be-aiñ.
Katkum ka kyrwoh khubor, ka KJCLF kala pynpaw ba ka long kaei kaei kaba sngewkhia halor ka jingjia ba ki riewhimet bad ki longïing longsem kiba dei naki jaidbynriew rit paid bad ki riewngeit Khristan kin shah shoh, kin shah kyndang bad shah sei na ki iing ki sem jongki bad naka shnong kaba ki shong ki sah.
Kaba kham sngew lyngngoh shuh shuh ka long ba ki bor sorkar kiba dei ban peit iaka aiñ ka kanun kila kyntait ruh ban register case ia ki briew kiba donkti ha katei ka kam thombor.
Ka KJCLF ka iasnohkti lang bad kiwei pat ki kynhun Khristan ha ka ri ha kaban pynrem jur ia katei ka jingthombor bad ka jingleh bymman bad ka kyntu ruh ia ki bor sorkar ba kidei ban pynshitom ia kiba donkti ha katei ka kam thombor bad ban ai ruh ka jingiada iaka jingim bad ia ka jingdon jingem jong ki nongshong shnong bad dei ban pynsangeh shi syndon iaka jingia umsnam bad jingisih iwei ia iwei.
Ka Forum kala kyntu ruh iaki nongialam niam ba kin ialeh pyrshah iaka jingisih bad jingiashun iwei ia iwei pat bad iaka jingleh shilliang khmat.
Kila kyntu iaka sorkar jylla bad ia ka sorkar pdeng ia ka jingdonkam ban don iaka jingiakren hapdeng ki jait niam bapher bapher khnang ban wanrah iaka jingiasngewthuh jingmut, jingsuk bad jingiatreilang hapdeng ki briew baroh bad da kaba leh kumtei, kan iarap ha kaban weng iaka jingtieng bad jingsyier haka jingim jong ki nongshong shnong ha kane ka ri kaba khraw.
