Shillong, Risaw 06 : Ka Federation of Khasi Jaintia and Garo People (FKJGP) kala pynrem jur iaka jingleh jong ki pulit kiba la kawang da ki bomb pynsat pynsat khmat iaki nonghikai kontrak ba iakhih hynne ka sngi ha IGP.
“Kane ka jingleh ki pulit ka long pyrshah ia ka ain long briew man briew. Ki pulit ki khlem pyrkhat shuh iaki nonghikai kynthei lane ki khunlung kiba la don bynta hangto” ong u Bah Elton Cliff Warjri, Senior Vice President ka FKJGP ha ka kyrwoh.
Kat kum ka jingong jong u, ki nonghikai contract kila shong iakhih la shi bnai hakhmat u Mot u Kiang Nongbah hynrei ka Sorkar kala leh mynthi ia ka jingdawa jong ki.
“Kaba lyngngoh ia ngi kum ka seng bad ki paidbah ka long ba kumno ym don pulit kynthei haka por ba kine ki nonghikai ki mut tur sha secretariat watla ka tip shai ba don hi nonghikai kynthei” ula buh jingkylli.
Ula ong “ Haka jingshisha ki pulit ki la dei ban pynjaijai haba ki la tip ba don ki khunlung ha kane ka kynhun ba mut tur sha secretariat”.
Une u Nongialam ka FKJGP ula pynpaw ba ka seng FKJGP ka ai ka jingkyrshan ba pura ia kine ki nonghikai contract bad ka phah ruh ia ka jingkitbok kitrwiang ia ki bahaiing hasem jong ki.
