Shillong, Jylliew 07 : Ka State Commission for Protection of Child Rights (SCPCR) kala pynrem jur ia u briew uba la kynnoh leh beijot ia ki 15 ngut ki Khynnah ha kawei ka Shnong ha West Khasi Hills District.
Kane ka jingjia kala paw pyrthei hadien ba uwei u Khynnah 10 snem ula kylla sohpdung ha une u briew.
Kat kum ka khubor, une u briew ula sdang ban leh ia kane ka kam bymman naduh u snem 2022 tad haduh ba kut jong u bnai Jymmang 2023.
Ka khubor ka iathuh ba ha ka 29 tarik Jymmang, une u khynnah ba shah leh beijot ha une u briew ula pyntip ia ka jingjia sha ki bahaiing kiba la ialam ia u sha Nongstoin Civil Hospital ban phah khmih ha ki doktor.
Hadien ba leh medical checkup, ki doktor kila pynthikna ba une u khynnah ula shah leh beijot bad dei hangne ba la mih ka kyrteng jong une u nongleh bymman.
Ki Pulit ka West Khasi Hills kila leit kem ia une u briew uba kyrteng u Meban Shangoi ha ka 31 tarik Jymmang ha ka jingiadon lang u Sordar ka Shnong lem bad ki riew rangbah ka shnong.
Ka Chairperson ka SCPCR kong Iamonlang Syiem haba iakren bad ki nongthoh khubor kala pyntip ba ki District Protection Officer ha ryngkat bad ki Pulit, kila hiar ban tohkit ban ioh ia ki jingtip ba pura halor kine ki jingjia.
Ka pyntip ruh ba ma ka lem bad ki Dkhot ka Commission kin sa hiar sha kane ka Shnong lehse ha ka taiew ban wan.
Ka Chairperson ka SCPCR kala bynrap ba kane ka khubor kala pynkyndit ia ki briew haba pyntip ba kala dep iakren ruh bad u Sordar jong kane ka Shnong uba la iathuh ba une u briew ula leh ia kane ka kam naduh u snem 2017. Ka ong ruh ba ki lah ban dang don bun ki khynnah kiba kylla sohpdung ha une u briew nalor ki 15 ngut.
