Guwahati, Jylliew 7: U Myntri Rangbah ka Arunachal Pradesh Pema Khandu ula pyntip ba ki Pulit ka Jylla kila ioh kem haduh 5 ngut ki briew kiba donkti ha ka jingsiat ia ki riew paidbah ba dang rakhe World Environment Day ha Panbari, kaba don ha Dhemaji, District ka Assam.
Haba iakren bad ki nongthoh khubor, u Khandu ula ong “San ngut kila shah kem haduh mynta. Lai ngut la kem hynnin ka miet bad arngut la kem hynne ka step”.
U Pema Khandu ula pynshai ruh ba ka jingther kuli ha Panbari, Dhemaji District ka Assam ka dei ka bym don jingiadei satia bad ka jingiakajia pud hapdeng ki artylli ki Jylla.
“Ka jingther kuli kam don jingiadei bad ka jingiakajia pud hapdeng ka Assam bad Arunachal Pradesh. Ka dei ka kam iakajia shimet hapdeng ki nongleh bad u nongshah siat” ula ong.
Ha ka sngi nyngkong, arngut ki briew kila shah siat iap bad bun kiwei pat kila mynsaw jur na ka jingshei kuli ha khappud ka Assam-Arunachal jong ka shnong Panbari. Kine kiba dei ki kyrteng u Boga Churia bad u Monitur Gagoi kiba dei na Dhemaji.
Kat kum ka khubor, ka kynhun ki riewkiengatiar na Arunachal Pradesh kila wan bad siat naphang iaki briew ha ka liang ka Assam katba ki dang iathung tynrai dieng ban rakhe ia ka World Environment Day.
