Shillong, Iaiong 1: Ka Kynhun Myntri ka Jylla kala ai jingmynjur kaba tang shisien ne One-Time Condonation ban ai jingithuh ia ka jingkyntiew kam ia ki nongtrei Adhoc kiba la shah thungkam pura hashwa u snem 2007.
Haba pynbna ia kane, hadien bala lum ia ka jingialang jong ka Kynhun Myntri ha ka sngi Balang, u Myntri Rangbah u Conrad K Sangma ula ong, “(Ngi lah iakren) ia ka jinglong jingman jong ki nongtrei Adhoc kiba la shah thungkam pura kiba la rangbah ha ka kam bad kumjuh ha ka jingkyntiew kyrdan. Kumba phi lah ban kynmaw, ngi lah dep thungkam pura ia ki kiba la shah thung Adhoc hashwa ka snem 2007 bad kumta kila don bun ngut bad ngi la kyntiew kam ruh ia ki”.
Ula ong ba ka jingbym shai ha ka rekod jong ka jingshakri ia ka kam kala pynslem ban ioh ia ka Pension, namar ba u Accountant General ula pan ia ka jingpynshai la kin ioh ia ki jingmyntoi kadei ban khein naduh ka por, ba kila sdang ban trei nyngkong eh ne naduh ba la kyntiew kyrdan ia ka kam ka jongki.
“Kala don katto katne ka jingbym shai bad kumta ngi lah rai ban thungkam pura noh ia kito kiba la shah kyntiew kyrdan, khamtam kito kiba la shah kyntiew kyrdan ne tang ia kito kiba shah kyntiew kyrdan kiba la leh katkum ka Service Rules bad iaid katkum ka lynti treikam ha katei ka por kadei kaba la bud na ka bynta kitei ki nongtrei Adhoc. Ngin ithuh ia ki bad yn ai ha ki ia ka lad kaba tang shisien ne One-Time Condonation bad kumta kine ki nongtrei kin ioh ia ka tulop katkum ka jingshah kyntiew kyrdan ka jongki”.
“Nga ong biang, tang ia kito kiba la shah kyntiew kyrdan ha ka rukom kaba biang bad kiba la bud ryntih ia ki kyndon ain bad ki jingbthah, ia kitei ki jingkyntiew kam, ngi ngin ai ia ka lad kaba tang shisien bad ngin ailad ba ka jingshah kyntiew kyrdan ka jongki kan ioh ia ka jingithuh khnang ba yn lah ban ai ia ka Pension katkum ka kyrdan kaba ki bat” ong u Sangma.
U Myntri Rangbah ula pynkynamw ba ka sorkar kham hashwa kala dep ban thungkam pura ia kumba 3,000 ngut ki nongtrei Adhoc kiba la shah thungkam hashwa jong u snem 2007.
