Shillong, Nailur 04: Ka Federation of Khasi Jaintia and Garo People (FKJGP) hynne ka sngi Nyngkong, ka pynrem jur ia u Myntri Sorkar bad MLA ka BJP na Pynthorumkhrah bah A.L Hek halor ka jingpynksan ban shim No Objection Certificates (NOC) bad Residential Certificates (RCs) naka Refugee Rehabilitation Welfare Society (RRWS).
Kane ka mih hadien ba u bah Hek ula kam ba u ioh iaka Residential Certificate (RC) naka RRWS.
“Kane ka jingkren u MLA ka pyntlot bor iaka Dorbar shnong ka Rynjah bad iaka the KHADC,” la ong ka kyrwoh na u Information Secretary ka FKJGP Nongthymmai Circle samla Banrilang Kharpyngrope.
“Ka FKJGP ka sngew ba u MLA udei ba sangeh ban kren kum ia kine ki kyntien ki bym shong nongrim bad kiba long kumba u ibein iaka bor jong ka Dorbar Shnong lane ka Synshar Khaddar tynrai” ula ong.
U samla Banrilang ula iathuh ba ha u snem 2012 ka seng kala ioh ia kawei ka syrnod bala soi da ki nongialam ka RRWS bad ka paw ba ka jingthoh kidei ki juh bala shim na ki syrnod jong ka Shillong Municipal Board bad hadien ka jingtuklar jong ka seng, la pynduh noh ia kane ka rukom ai syrnod.
Ka seng ka maham tyngeh iaka RRWC ba kadei ban sangeh shisyndon ban tuklar iaka rukom pyniaid shnong lane ka rukom ai syrnod kum ka NOCs bad RC sha ki briew jong kane ka thain.
U nongialam jong ka FKJGP Nongthymmai Circle ula ong “ka RRWS kadei ban bud ryntih iaka jingbthah naka Hima Mylliem 2019 namar la pynbna ba ia kane ka RR Colony la dep pynbna kum ka Them Rynjah bad lada ka RRWS kam sngap ka seng kam banse ban shim da kiwei ki sienjam”.
