Nongstoin, Risaw 23 : Ha ka sien ba nyngkong ban iohsngew ne iohi, ba ka kynhun kaba long ka Champion (Lahduh) jong ki lympung ialehkai, kin pynphai noh ia ka khusnam pisa ban iadonbynta lem bad ki nongpyniaid ha kaban ai jingiarap ia ki briew kiba donkam eh ia ki lad jingiarap.
Kane ka jingjia kala jia hynne ka sngi Nyngkong ha ka lympung ialehkai ka seng HYNF Mawthawñiaw, Diskiang Unit West Khasi Hills, kaba la pynlong ha madan Diskiang, kum shibynta ban pynmih pisa ha kaban ai jingkyrshan ia ki briew kiba don jingduna dkhot met hapoh ka thain.
Ha kane ka lympung ialehkai, ka Jyrwa Ft Mawthawñiaw kala ioh ban rah ia ka nam jop da ka jinglah ban pynliem ia ka M.Junior Footbal team Mawkhmahwir Pyndengrei da 2-0 kol.
Hynrei kane ka kynhun kaba ioh rah ia ka nam lahduh (champion) kala shim tang ia ka trophy kum ka lahduh bad pynphai noh ia ka khusnam song pisa sha ki nongpyniaid kum ka dak ban iadonbynta lem ha ka jingiarap ia ki briew kiba duna dkhot met.
Ia kane ka rai jong ka kynhun la pynbna da u Bah Bony Jyrwa uba lamkhmat ia kane ka kynhun. Kane ka jingleh jong katei ka kynhun ka la pynkyndit ïa ki paidbah nongpeitkai namar kum kane kam pat ju jia mynno mynno ruh bad ka la long ka sien kaba nyngkong ha ka thaiñ.
Ia kane ka lympung ialehkai la pynhap pyrda da u samla Skhemdingwell Mawlieh Working President ka Nongstoiñ Assembly Youth Congress ha ka jingïadonlang u bah B.Marbaniang President HNYF West Khasi Hills District, bah Crefitstone Syiemlieh president HNYF Mawthawñiaw Diskiang Unit, u bah Nabarlin Wanñiang Secretary ka shnong Diskiang bad kiwei kiwei ki dkhot ka seng HNYF.
