Shillong, Jymmang 19 : Ka kynhun kiengatiar Hynniewtrep National Liberation Council (HNLC) hynne ka sngi Thohdieng, kala pynpaw ba kam lah satia ban pynthikna ba haduh katno ka jingiakren iasuk bad ka Sorkar ka lah ban iaid jngai lane kan long kaba jop.
“Ka HNLC ka kyrmen ia kaba bha tam na kane ka jingiakren hynrei ngim lah ban pyntikna ba haduh katno kane ka jingiakren ka lah ban iaid jngai lane kan long kaba jop namar kat haduh mynta mynne ka jingiakren iasuk kaba Jop ka dei tang ka Mizoram peace accord 1986 lada phi khein haka pyrthei baroh kawei ne haka histori jong ka ri India. Hynrei, kiwei kiwei ki jingiateh soskular ki seng kiengatiar bad ka Sorkar India kim poi shano shano ki shu kut tang haki jingthoh bad ki jingkular jong ka Sorkar” ong u General Secretary cum Publicity Secretary ka HNLC Bah Sainkupar Nongtraw..
Kane ka jingpyllait khubor ka HNLC kala mih tang arsngi hadien ba u Myntri Rangbah ka Jylla Conrad K Sangma, ula pynbna ba ka jingiakren iasuk ba pura (formal talks) kan sdang noh ha u bnai Jylliew. Kane ka jingpynbna kala mih ruh hadien ka jingiakynduh u Symbud Myntri Rangbah ka Jylla ba khmih ia ka Tnad kam Pohiing (Police) Bah Prestone Tynsong bad ki Nongialam ka HNLC ha ka jingiadonlang u ksiang Bah PS Dkhar.
Hynrei une u Nongialam ka HNLC ula pynpaw ba ka rai jong ka HNLC ban wan shakhmat ban iakren iasuk bad ka Sorkar kam dei sati aka “jingpyndem wait” bad ong “Ngi khlem wan ban pyndem wait hynrei ngi kwah ban iakren sngewthuh jingmut bad ban ia pynbeit halor ki jingeh ka sain hima suma jong ka Jaidbynriew Hynniewtrep”.
“Kam shym don kano kano ka jingioh jingmyntoi shimet hynrei ka dei na bynta ka jingiohnong jong ka Jaidbynriew hi baroh kawei” ong u Bah Sainkupar.
U Bah Sainkupar ula pynpaw ruh ba ka jingangnud bad ka thong jong ka HNLC kam dei ia ka “Seperation” lymne ia kata ka ‘Integration hynrei ngi iengskhem ban ioh iaka ‘recognition’ ne kata ka jingithuh kum ka Jaidbynriew kampher da ka long hapoh ne shabar jong ka ri India.
“Ngi donkam iala ka jong ka iing kaba skhem kaba ngi lah ban kam ba ka dei ka iing bashisha jongngi kumba long ki Mizo, kiba don iaka Mizoram” ula ong haba bynrap “ Ka sorkar ka donkam ban weng iaki jingeh naduh tynrai(permanent solution). Ngi donkam ka khyndew la ka jong namar ka khyndew ka dei ka tynrai jong ka jingim(LAND is the basis of all existence)”.
“Haba ngi don iala ka jong ka khyndew ngi lah ban shna laka jong ka Sorkar bad ieng ialade kum ka jaidbynriew kaba laitluid. Halor ka khyndew ka shyiap lajong ngi lah ban seng iaki karkhana,ki kam ki jam,ngin bat hi iaka ioh ka kot bad ka synshar khadar halade hynrei lada ngim don tang shilyngkhot ka khyndew ka mut ngim doneiei. Ngi lah ban pyndonkam iaki marpoh khyndew,ki khlaw ki btap,ki um ki wah na bynta ba ngin im ialade” ula ong.
Une u Nongialam ka HNLC ula ong ruh “Ki paid Garo ruh ki hap ban sngewthuh bha ia kane ka bynta bad maki ruh ki donkam noh jar laka jong ka khyndew bad ka iing”.
“Ngim kwah ba Ki Achik bad ki Hynńiewtrep kin kylla long sa kiwei pat ki Jaidbynriew Kuki ne ki Rohingya lymne kum ki Kurds ki bym don laka jong ka khyndew(landless) lymne ki bym don laka jong ka ri(stateless) hynrei ki dei ki jaidbynriew kiba shu bun tang u paid(stateless population) bad kiba hap ban shu phetwir pat ialade kylleng kylleng” ula ong.
