Shillong, Nailur 16 : Ka Sorkar Jylla kala pynmih ia ka jingpynbna ia ka combined counselling SOP na ka bynta ka jingleit pule MBBS ba 138 seat u snem 2026-27, bad ia kane ka kam yn pyniaid da ka Meghalaya State Counselling Authority for Medical Education (MSCAMA) da kaba pynshong nongrim ia ki kyrdan ba ioh ha ka eksam NEET-UG 2026.
Ki 138 tylli ki seat ki kynthup ia 96 seat hapoh ka Central Pool bad kiwei ki bhah ba ai sha ka Jylla Meghalaya lem bad ka 42 seat na ka bhah ka Jylla hapoh ka Shillong Medical College (SMC).
Kat kum ka SOP, ki 96 seat ki kynthup ia 53 na ka Central Pool, 14 ha NEIGRIHMS, 16 ha RIMS Imphal, 10 ha Assam Govt Medical College bad 3 tylli ha Tripura. Ka jingsam bhah kan long mar 39 ia ki Khasi-Jaintia bad Garo, 14 ia ki Unreservced bad 4 ia ki SC/OST.
Na ki 50 seat bala mang da ka NMC na ka bynta ka SMC ha une u snem pule, 8 tylli kan leit sha ka All India Quota bad 42 sha ka State Quota, ka ban iasam kat kum ka State Reservation Policy-40% ia ki Khasi-Jaintia, 40% ia ki Garo, 15% ia ki Unreserved bad 5% ia ki SC/OST.
Kiba lah ban ioh pule kin hap ban pass ia ka Klas XII ryngkat ka Physics, Chemistry, Biology/Biotechnology bad English. Ka rta bar it eh ka long 17 snem hapoh ka 31 tarik Nohprah 2026 nalor ka syrnot nongshongshnong bad trai jylla ryngkat ka PRC bad ki syrnot.
Ka Counselling kan don saw bynta kynthup ka Stray Vacancy Round, ryngkat ka online registration, jingpynshisha ia ki kot ki sla bad ka jingwan mih dalade.
Kala buh ruh ia ki kyndon ban pynphai ia ki seat, PwBD assessment bad ka tie-breaking.
Ka Sorkar kala buh ia ka bond ba san snem ba hap ban soi da ki samla pule kiba leit pule naka bhah ba bei ka Sorkar, ban sahkri ha ka Sorkar lane ki mission hospital bala ithuh da ka Sorkar.
Ka control room, helpdesk kan treikam ha ka por ba pynlong ia ka counselling.
La bthah ia ki kyrtong ba kin buddien tang ia ki jingpynbna ba pynmih da ka MSCAMA bad ban phikir bha ia ki notice thok lane ki website ba thok.
