Shillong, Nailur 16: Ka BJP Meghalaya ha ka sngi Balang kala ai khublei ia u Myntri Rangbah ka Jylla u Conrad K Sangma halor ka jingpynduh pyndam noh ia ka wat kaba nyngkong jong ka jingsam bhah pule MBBS hadien ba kala don ka jingkynnoh ba kala don ka jingleh thurmur kumba la pynpaw da ka seng.
Ha ka kyrwoh khubor u Nongaiktien ka BJP u Bah Mariahom Kharkrang ula ong, ba ka seng ka pynpaw ia ka jingsngewnguh ia ka sorkar kaba la shimkhia halor ka jingpyrshah kumba la pynpaw da ka BJP Meghalaya bad kiwei pat ki kynhun.
U Bah Kharkrang ula ong ba ka jingkhmih bniah ia ka jingbhah kala pyni ia ka jingdon ia ki jingduna ha kaba ki samla kiba la wan shakhmat kila shah kyntait bad la pdiang pynban da ki samla ki bym shim la wan shakhmat.
“Ngi sngewnguh ia ka Sorkar kaba ialam da u Conrad Sangma kaba la shimkhia ia kane ka jingpyrshah kaba la pynsngew da u MLA ka BJP u Bah AL Hek bad ki kynhun jing ki samla pule” ong u Bah Kharkrang.
Ula ong ba u MLA ka BJP u Bah AL Hek, ha ka shithi kaba la phah sha u Myntri ka koit ka khiah bad sha u Myntri Rangbah ka Jylla, ula kdew halor ki jingjia jong ka jingleh bakla kaba jur bad ka jingleh kiar ha kaban bud ia ki kyndon treikam ha kaban jied ia ki samla.
Ka seng kala pynpaw ia ka jingshaniah kaba skhem ha ka sorkar ba kan pynthikna ia ka jingkhuid ha ka rukom jied kaba thymmai.
“Ngi don ia ka jingshaniah ba ka sorkar kan pynthikna ba kan don ka jingkhhuid bad ka jingbym shah liang ia baroh ha ka jingjied thymmai bad ngi ai khublei ia baroh ki samla kiba dei hok ban shah jied” la ong ha ka kyrwoh.
