Shillong, Nohprah 19: Da ka jingkhmih lynti ba ka aiom lehkmen Christmas ban wan, kan wanrah ïa ka jingbun ki kali bad ki nongleit nongwan, ki Pulit kila kyntu ïa ki nongleit nongwan ha Shillong ban bud ryntih ïa ki kyndon niah kali ban pynthikna ïa ka jingshngaiñ jong ki paidbah bad ka jingiaid beit iaid ryntih ki kali.
La khmih lynti ia ka jingkhapngiah kaba jur hajan ki iew ki hat, ki jaka mane bad ki jaka pynlong jingialang.
La kyntu iaki paidbah ban pyndonkam ia ki kali kamai katba lah, ban kiar na kaba pynieng kali ha rud surok, bad ban pyndonkam ia ki jaka pynieng kali ba la buh kyrpang.
La bthah ia ki nongleit nongwan ba kin kiar na kaba iaid na surok bad pyndonkam ia ki lynti iaid kjat (Footpath) bad ban jam sha shilliang ia ka surok naki jaka ba la buh kyrpang.
“Niah kali da ka jingkitkhlieh, wat dih kyiad bad niah kali. Kiar na ki jingjia aksiden bad iada ia la ka jong ka jingim da kaba kiar ban niah sted. Pynthikna ban deng helmet bad seatbelt ha man la ka por ba niah kali bad niah da kaba husiar,” ong u Superintendent of Police, East Khasi Hills u Bah Vivek Syiem.
Ki pulit Shillong Traffic Police (STP) kin pynlong ïa ka jingtalasi kaba tyngeh ïa ki jingpynkheiñ ïa ki Motor Vehicle Act, bad ki lah ban pynkylla lynti ïa ka jingïaid jong ki kali ha kylleng ka Police Bazaar bad ka thaiñ Laitumkhrah katkum ka jinglong jingman jong ka leit ka wan.
