Shillong, Nohprah 19 : Ka Kynhun Myntri ka Sorkar Jylla ha ka sngi Thohdieng, kala ai jingmynjur ban tied ia ka jaka Sorkar ha Greater Noida, Uttar Pradesh, ban tei ia ka Meghalaya House.
Kane ka sienjam ka dei kaba la shim da ka jingthmu ban ai jaka sah bad ki jingshakri ba donkam ia ki samla pule bad nongshongshnong ka Jylla kiba leit sha ka Nongbah ka Ri, khamtam da ka jingwan thymmai ka Jewar International Airport.
Haba kren sha ki lad pathai khubor hadien ba pyniaid ia ka jingialang, u Myntri Rangbah Conrad K Sangma ula ong “Ka Kynhun Myntri kala ai jingmynjur ban thied ia ka jaka ha Greater Noida, Uttar Pradesh ban tei ia ka Meghalaya House. Da ka jingwan ka Jewar International Airport, ka sa kylla long ka jaka ba kongsan bha. Ka Sorkar ka sngew donkam ban don la ka jong ka jingtei na ka bynta ki samla pule bad ki nongshongshnong kiba leit sha ka Nongbah ka Ri bad ka thain NCR. Ka long kaba kongsan ban don iala ka jingtei ha ka thain”.
Ula bynrap ba kane ka jingiadie iathied ka dei hapdeng para Sorkar, bad ka jaka ka dei kaba heh kumba 8000 sqm ha ka dor ba T.32 klur, ka dor bala buh da ka Sorkar Uttar Pradesh.
Kane ka Meghalaya House kan shakri kum ka jaka pdeng ia ki Nongtrei bad ka jaka sah ia ki samla pule, ka ban nang pynsuk bad pynjan sha ki jaka pule, ki Ophis ka Sorkar bad ka kad liengsuin ban sa wan.
Kane ka project la khmih lynti ba kan pynkhlain ia ka jingdon ka Jylla ha ka thain NCR bad pynkhlain ruh ia ka jingshakri ia ki nongshongshnong ka Meghalaya ha ka thain.
