SHILLONG, Risaw 11: Ka jylla Meghalaya kala pynlut haduh T.1600 klur naka bynta ban sam um lyngba ka skhim Jal Jeevan Mission (JJAM) bad haduh mynta palat 1400 tylli ki shnong hapoh ka jylla baroh kawei kila ioh um ha man la ki tyllong ïng.
Ia kane la pyntip da u myntri ka tnat PHE u bah Renikton Lyngdoh Tongkhar hadien ka jingialang jong ka tnat ban pyrkhat iaki kam ba dang sah bad kumjuh ruh ban bishar iaki kam bala dep pyntrei ha baroh kawei ka jylla Meghalaya.
Haba iakren bad ki lad pathai khubor u bah Renikton ula ong ba hynne ka sngi ula lum ka jingialang jong ka tnat PHE ban iakren halor ka skhim JJM ban pyniaid beit iaki kam namar ka tnat ka kwah ban pyndep noh iaki kam hapoh ka skhim JJM hapoh u snem 2022.
U bah Renikton ula ong ba watla ka jylla Meghalaya kala shah pynkup burom kum kawei na ki jylla hapoh ka ri India kaba la pyntreikam bha iaka skhim JJM hynrei ki dang don bun ki kam ba ka tnat PHE ka donkam ban leh naka bynta ka jingmyntoi ki paidbah khamtam ha ki thain nongkyndong.
Ula ong ba ha ka jingialang mynta ka sngi, la wan shim bynta da ki ophisar ka tnat PHE, ki kontraktor bad baroh ki ba don bynta ha ka jingpyntrei iaka skhim JJM bad ha kane ka jingialang, kala don ka jingiaphylliew jingmut da baroh khnang ban pyntyllun beit iaki kam ki kam hapoh ka jylla.
“Haka jingialang nalor ka jingiatai halor ki kam kiba dei ban pyndep, naka liang ka tnat kala sngew ruh iaki jingud jingnam ki kontraktor kiba khlem pat ioh iaka pisa kiba kidei ban ioh naba pyntrei iaka skhim JJM hapoh ka jylla” la ong u bah Renikton.
U bah Renikton ula ong ba donkam ka jingiatreilang hapdeng baroh naduh ki kontrator, ki ophisar bad baroh kiba don ha kane ka bynta khnang ban pynthikna ba ka jylla Meghalaya kan lah ban pyndep ia ka skhim JJM haka por bala buh.
Ula iathuh ba ka sorkar jylla naduh nyngkong kala buh thong ban ai jingmyntoi iaki 5.89 lak tylli ki longïng lyngba ka skhim JJM bad haduh mynta ka sorkar la dep ban mang kumba 5.62 lak tylli bad ka long kaei kaei kaba kmen ba ka sorkar jylla kala pynbun shuh shuh iaki longïng ki ban ioh jingmyntoi myntoi lyngba ka skhim JJM shaka 630000 tylli ki longïng.
Haba kylli hato ka tnat PHE kan dang pan jingiarap pisa ne em naka sorkar pdeng haba iadei bad ka jingpyntrei iaka skhim JJM, naka liang u myntri ka tnat PHE u bah Renikton Lyngdoh Tongkhar ula iathuh ba ka sorkar pdeng kala iarap shibun iaka Meghalaya bad haduh mynta ka tnat kam don jingeh haka liang pisa ban pyntrei iaka skhim JJM.
U bah Renikton ula ong ba haduh mynta ka jingpyntrei iaka skhim JJM hapoh Meghalaya kala tam iaka 40% bad naka liang ka tnat kan ialeh katba lah ban pyndep kham bun tylli ki shnong hapoh une u snem namar ka suin bneng ruh kan ailad ban pyniaid beit iaki kam.
