Shillong, Iaiong 25: Ka BJP Mahila Morcha Meghalaya Pradesh hynne ka sngi Saitjain kala pynlong ia ka jingiakhih ha Khyndailad, Shillong bad dawa ba dei ban pyntreikam mardor ia ka bhah 33% na ka bynta ki kynthei ne ka 33% Reservation for Women ban shah jied kum ki nongthawaiñ.
Ki dkhot jongka Meghalaya BJP Mahila Morcha bad ki Karyakarta kila iashimbynta ha ka jingiakhih ban dawa ba dei ban pyntreikam mardor ia ka bhah 33% na ka bynta ki kynthei bad kila pynrem jur ruh ia ka seng Congress halor ka jingbym ai jingkyrshan ha ka Iing Dorbar Thawaiñ ka ri ban pynlong aiñ ia ka Womens Reservation Bill.
Ka BJP Mahila kila iaid paidbah ryngkat ka jingrah ia ki jingthoh plakad bad pynrem jur ia ka seng Congress bad ia kiwei kiwei ki seng saiñ pyrthei kiba don ha ka Liang Pyrshah ha Ïing Dorbar Thawain ka ri.
Da kaba pynsawa jam ia ka sur jingdawa ryngkat bad ka rah ia ki jingthoh ne Placard kine ki nongiakhih kila dawa ba dei ban don ia ka jingbym leh shilliang khmat ha ki jaka thawain ha ki jylla bad ki kam shynshar khaddar ha ryngkat bad ka banjur ba ka sur ki kynthei ka long kaba kongsan na ka bynta ka kam synshar khaddar kaba salonsar.
Kum ban shu kdew kane ka Bill kala shah rem ha ka Parliament ban ioh ia ka jingmynjur ban kylla long aiñ namar ka jingbym don ia ka jingbun paid ha kaba kial don tang 298 ngut kiba kyrshan katba kiba pyrshah ki don 230 ngut bad ym shim la ioh ia ka nombar kaba dei ban ioh.
Ka State President ka BJP Mahila ka Kong Arena Hynniewta kala ong, ba ka jingiakhih jong ki, ka long ban dawa ia ka hok jong ka bhah kaba 33 percent kaba la mang kyrpang ia ki kynthei bad ha ka jingshisha kane ka Bill kala dei ban long ain, hynrei ki seng saiñ pyrthei kiba don ha ka Liang Pyrshah kim shym la trei ryngkat bad kim shym la kyrshan ban pynurlong ia kane ka jingdawa kaba la slem bah bad kaba long kongsan bha na ka bynta ki kynthei ha ka ri India.
Kala ong, ba ka dap da ka jingsngewsih namar ba ia ka hok ban bhah 33 percent la mang kyrpang ia ki kynthei, kam shym la urlong namar ka jingbym kyrshan ki Liang Pyrshah.
Ka Kong Hynniewta kala ong, ba kane ka Bill ka long kaba kongsan bha khamtam haba kan aiald ia ki kynthei ban shah jied kum ki nongmihkhmat sha ki iing dorbar thawaiñ bad kin ioh ia ka lad ban ai ka jingshakri kaba kham bha ia ka imlang sahlang.
