Nongpoh, Iaiong 25: Arngut ki samla kila khlad noh, hadien ba ka thukthuk kaba ki shong kala leit tynrah ia kawei ka trok, hynne ka sngi Saitjain ha ka surokbah National Highway kaba don ha 15 Mer Byrnihat.
Katkum ka khubor ba la iohlum, la iathuh ba kane ka jingjia, kala jia ha ka por 5 baje eiei ha kaba kawei ka thuk thuk kaba khlem don nombar kaba la niah da u Nikunja Boro na Rongpur Sankardev, Hojai bad uwei pat uba shong nadien u Riki Amchi namar ka jingpynher sted kila leit tynrah nadien ia kawei ka trok kaba don ia u nombar ML 11 A 1367 kaba la niah da u Prakesh Paudel na Lum Nongrim, Umsning.
La iathuh ruh, ba ha katei ka jingjia tyngkhuh ka thukthuk, u Riki ula khlad hashen katba u Nikunja uba niah ia ka thukthuk ula khlad noh shwa ban poi ha ka jaka ai jingsumar ha Guwahati.
Ki pulit ka Byrnihat Police Station ryngkat ki nongtrei ka NHAI kila pynkit noh ia ka met jong uba khlad ha shen sha Nongpoh Civil Hospital ban leh ia ka post mortem bad ka jingtohkit ka dang iaid shakhmat.
