Nongstoiñ, Ïaiong 26: U Myntri ka Sorkar pdeng ba khmih ïa ki kam rep, Bhagirath Choudhary, u la pynlong ia ka leit jngoh ba shi sngi ha Eastern West Khasi Hills District ha ka sngi Saitjain, ban buddien halor ka jingpyn treikam ïa ki skhim ba la bei tyngka da ka sorkar pdeng hapoh ka District.
Ia u Myntri la synran da ka Deputy Commissioner Kong Anita Kharpor IAS, ha ka jingdonlang ki ADCs, ACs, bad ki ophisar sorkar na ki tnad treikam bapher bapher jong ka District.
Ha ka jingïalang kaba la pynlong ha Multipurpose hall DC’s office, Mairang, la ïoh ïa ka jingbatai pynshai halor ka jingpyntreikam ïa ki skhim bapher bapher ka sorkar pdeng da ki tnad sorkar kiba don hapoh ka district, kynthup ïa ka tnad pule puthi, ka tnad rep , KVK, PWD roads, ka tnad ri dohkha, ka tnad ka koit ka khiah, ka tnad pynroi ha ki nongkyndong bad kiwei.
Ka jingthmu jong kane ka jingwan jngoh, ka long ban khmih halor ka jingpyntreikam ïa ki skhim ba la bei tyngka da ka sorkar pdeng, ban tip lada don ki daw kiba pynthut ne pynwit ïa ka jingpyntrei ïa ki skhim bad ban pyntikna ba la pyntreikam hok ïa baroh ki skhim. U Myntri u la ïohlad ruh ban ïa kren markhmat bad ki nongrep halor ka jingmyntoi ba ki ïoh na ki skhim sorkar.
Ha ka jingkren jong u, u la ong ba ka ri India ka dei ka ri kaba don bun eh ki nongrep, bad ka jait kam kaba wan hakhmat eh ka dei ka rep ka riang. Ki paid nongrep ki trei shitom baroh shisnem ban pyndap ïa ka jingdonkam ka ri, kim don ka por ban shongthait, ki ïai trei shitom, hynrei ki ïai sah kumjuh khlem da don ka jingïohnong.
Dei halor kane ba u Myntri Rangbah ka ri U Narendra Modi, u la shim ïa ki lad ki lynti bad phaikhmat sha ki jaka kyndong kiba ju im da ka rep ka riang ban kyntiew ïa ka kam rep, khnang ba kan pynmyntoi ïa ki nongrep lyngba ki skhim bapher bapher.
U la ong ruh ba ka ri India ka la buh ïa ka thong ban pynpoi ïa ka ri sha kata ka kyrdan kum ka ri kaba la kiew ha ka ïoh ka kot ha[oh u snem 2047. Ïa kane yn lah ban pynurlong tang lyngba ka jingkiew ha ka ïoh ka kot ki nong rep bad ka jingkiew ki kam pynroi ha ki shnong ha nongkyndong. Khlem da lah ban kyntiew shwa ïa ki kam pynroi ha ki nongkyndong, ka ri kan nym lah ban kynjoh sha kata ka kyrdan, u la ong.
U la pynpaw ruh ïa ka jingsngew kmen halor ka jingpyntrei hok ïa ki skhim sorkar hapoh ka district. U la ïawer ba kin dang trei shitom shuh shuh khnang ban lah ban kyntiew ïa ka district, ka jylla bad ka ri hi baroh kawei.
Shuh shuh, ha kane ka sngi na ka liang ka tnad rep ka la pynlong ïa ka jingsam ïa ki symbai kba bad symbai sying sha ki katto katne ki nongrep. Hadien kane u Myntri Sorkar Pdeng u la leit ban jngoh ïa ka Krishi Vigyan Kendra (KVK) kaba don ha Nongshillong bad pynlong ïa ka jingïakynduh bad ki Ophisar kiba dei peit ïa ka KVK.
