Guwahati, Iaiong 26: Ha ka jingjia aksiden kaba shyrkhei shwa ka kynjatshai, lai ngut ki samla kynthei ki la duh noh ïa la ka jong ka jingim hadien ba kawei ka kali kaba ïaid stet, ka la tynrah ïa kawei ka trok kaba sahkut hajan ka khyrdop jong ka hospital ha ka thaiñ Matgharia, kaba la pynlong ïa ka jingtohkit kaba jur jong ki pulit bad ka jingwad ïa u nongñiah kali uba la phet krad.
Kine ki lanot ki dei kiba la tip kyrteng kum ka Puja Saha (26 snem ka rta) na Goalpara, ka Akanksha Saikia (23 snem ka rta na Gaurisagar ha Sivasagar bad ka Armina Ahmed kaba dei ka samla pule B.Tech jong ka Assam Down Town University bad ka khun jong uwei u pulit CRPF uba don ha Bongaigaon.
Katkum ka jingong ki pulit, katei ka kali kaba don ia u nombar AS01GP0562 ka dang iaid stet bha haba ka la tynrah ia kawei ka trok kaba ieng.Arngut ki nongshong kali ki la khlad noh ha katei ka jaka, katba ia kaba lai, kaba la sahkut hapoh katei ka kali, la ioh ban pyllait hynrei ka don hapdeng ka jingmynsaw kaba jur bha hynrei hadien ka la khlad noh na ka jingmynsaw ha Gauhati Medical College and Hospital (GMCH).Ka Puja Saha bad ka Akanksha Saikia ki dei kiba trei ha Royal Global University.
Ki pulit pyniaid kali ki la ong ba jingjia kadei namar ba ka kali ka la tynrah ia u divider bad ban kylla bunsien.Ki kynhun pynlait im ki la hap ban pyndonkam da ki tiar kiba heh, kynthup ïa ka bulldozer, ban sei ïa ki lanot.
Utei u nongniah kali, la tip kyrteng kum u Samim Ahmed, u la phet krad mardor hadien ba u la tynrah bad haduh mynta ym pat lah ban lap ia u.Ki pulit ki la pynlong ia ka jingkhynra bad ki dang tohkit hato ka jingbym shimkhia, ka jingpynher stet palat, ne kiwei kiwei ki daw ki ba la pynlong ia katei ka jingjia aksiden kaba shyrkhei.
Ha ka jingtohkit la lap ba ia kane ka kali la ai wai na kawei ka travel agency. Mynta ki bor pyniaid ki dang pyrshang ban iakynduh ia kito kiba don jingiadei bad katei ka tnad, wat la ki phone jong ruh ka phone ka dang off.La kurup noh ia ka trok kaba donkti ha katei ka jingjia, bad ka jingpyrshang ka dang iaid shakhmat ban wad ia u trai jong ka.
Ki heh pulit, ba kynthup ïa u DCP u Jayanta Sarathi Borah, ki la leit jngoh ïa ka jaka ba jia ka jingjia aksiden, katba ki kynhun forensic ki la sdang ban pynwandur biang ïa ka jingbud ryntih jong ki jingjia.
Kane ka jingjia ba sngewsih ka la pynkyndit ia kiba ha iing ha sem bad ki paralok. Kawei ka paralok kaba iajan bha bad ka Akanksha Saikia ka la ong ba ka la pyntip sha ka jaka sah jong ka (paying guest) ba kan sah miet bad paralok jong ka—shi kynta shwa ka jingshah tynrah kali.
Ki pulit ki la ong ba ka jingtohkit kaba kham bniah ka dang ïaid shakhmat ban lap ïa ki jingjia kiba thikna kiba la pynlong ïa katei ka jingjia aksiden, wat haba ki jingkylli ki nang mih halor ka jingpynher stet palat pud bad ka jingkitkhlieh ha ki surok sor.
