Shillong, Rymphang 09: Ka Meghalaya ha ka sngi Nyngkong, ka la pynlong ia ka mock drill ba khie u jumai bah ha kylleng ki jaka ka Jylla kum shi bynta jong ka jing pynkhreh iaki paidbah bad peitthuh ia ka jingpynkhreh ka Jylla bad ki bor ai jingiarap.
Ia kane ka mock drill la pynlong da ka tnad Revenue and Disaster Management, ka Meghalaya State Disaster Management Authority bad ka District Disaster Management Authority (DDMAs), kaba la leh kat kum ka jingbthah jong ka National Disaster Management Authority (NDMA) ka tnat Ministry of Home Affairs (MHA) hapoh Meghalaya, Arunachal Pradesh bad Mizoram.
Ia kane ka jingpynkhreh la sdang da kaba pynsawa ia ki siren ha ki State Emergency Operation Centre (SEOC) bad District Emergency Operation Centres (DEOCs) da kaba pyniasriem ia ka jingjia ha ka jingkhynñiuh jumai. Ki nongiashim bynta ki la bud ia ki kyndon kata “Drop-Cover-Hold”, hadien kata la pynlong iaka pynkynriah paidbah, bad la pynlong ia ki jingpeit bniah ia ki jingjulor jong ki jingtei.
Haka jingpynwandur jumai, la donkam ban pynkylla sha ka jingpyniadei lyngba ki radio & satellite, ka jingpynlong ia ki kynhun ai jingiarap ESF, ka jingpynpoi ia ki UAV, ka jingshna dur digital ia ki jingpynjot bad ki kam ai jingiarap, ka jingpynkhlain ia ki jingtreikam jong ka SEOC, bad ki jingpynbna na ki distrik.
Kine ki sienjam ki la pynlah ban iasam ia ki jingtip ha ka por ba biang hapdeng ki SEOC, ki DEOC bad ki Incident Response Teams (IRTs).
U Maj. Gen. Sudhir Bahl (Retd.), Lead Consultant (ME & IRS), NDMA, New Delhi, ula pynlong iaka jingjurip iaki jaka ban lap iaki rukom pynkhreh.
Ka kynhun ka la leit jngoh ia ka jaka pynlong Staging ha Seng Khasi Secondary School, Marbisu, ka la bishar ia ki jingdonkam ha ka jaka ai jingsumar ha iew Mawngap, bad ka la jurip ia ka jaka ba don jingtwa khyndew bad kiwei kiwei.
Ka Commissioner bad Secretary ka tnat Revenue and Disaster Management ka Kong Matsiewdor War haka jingkren ka la ban jur ia ki jinghikai ba la ioh na ki program jingpynkhreh ba la dep bad ka la pynpaw ia ka jingdonkam ban iai pynlong ia kum kine ki program ban pynkhreh lada wan u jumai.
Ka la kdew ba katba ka khlam COVID-19 ka la tynjuh ïa ki rukom treikam jong ki bor Sorkar, ka jingkhynñiuh jumai bah kan donkam ïa ki lad jingïarap kaba kham kloi bad kaba khlaiñ.
Haba kren ha ka jingïalang u Maj. Gen. Sudhir Bahl (Retd.) u la ong, “Ka jingthmu jong ka mock exercise ka long ban don ïa ki rukom treikam kiba biang khnang ba ki lad jingïarap kiba biang kin poi sha ka jaka ha ka por kaba biang katkum ka jingdonkam.”
