Pynlong ka High Court ia ka symposium halor ka Iingkashari, ki lad pathai khubor bad ki Ain 6th Schedule

Shillong, Iaiong 19: Ka iingbishar Meghalaya High Court kala pynlong ia ka prokram halor ka mat “Judiciary and the Media, Local and Customary Laws under the Sixth Schedule in Meghalaya” hynne ka sngi saitjain hapoh ka Auditorium jong ka High Court.

U Justice Surya Kant, u nongbishar jong ka Supreme Court ka ri India, ula plie ia kane ka prokram kum u kongsan bad ula ai jingkren halor ka phang “Optimizing Court Appearance: Harmonizing Physical, Virtual and Hybrid Mode with Live Streaming Restrictions.”

Katba u Justice Pinaki Chandra Ghose, u nongbishar barim jong ka Supreme Court k ri India ula long kum u kongsan symbud ha kaba la iadonlang u Justice I.P. Mukerji u Chief Justice ka Meghalaya High Court, ka Justice Moushumi Bhattacharya ka nongbishar jong ka High Court ka Telangana, u Justice H.S. Thangkhiew bad u Justice W. Diengdoh kiba long ki nongbishar ka Meghalaya High Court.

Kane ka prokram kala pynmih ia ka jingiakren bad ia ki jingiatai kiba don jingmut halor ka jingiadei hapdeng jong ka iingbishar bad ki lad pathai khubor bad ka jinglong kaba kyrpang jong ka riti dustur tynrai hapoh jong ka Sixth Schedule ha ka jylla Meghalaya.