Shillong, Naitung 05: Ki Nongtrei ka National Health Mission (NHM) ka Jylla hynne ka sngi ba-ar kila pynlong ia ka rally ha Nongbah Shillong bad Tura ban dawa ia ka Sorkar Jylla ba kan ai ia ka jingsiew tulop kaba biang kaba iahap kat kum ka jingshakri jong ki ban pynbiang ia ki lad aijingsumar hapoh ka Jylla.
Ha Nongbah Shillong, kane ka rally kala long ha Madan Malki kaba la sakhi ia ka jingwan iashimbynta da baroh ki Nongtrei ka NHM kiba kynthup naduh ki Nos, ki Lab Technician, ki Nongniah kali, ki Data Entry Operator bad kiwei kiwei, ha kaba bun na ki, ki dei kiba ai ka jingshakri sha ki jaka nongkyndong kynthup ha ki PHC.
Ha Tura, ki Nongtrei ka NHM kiba la wan baroh ki 5 tylli ki District ka Ri-lum Garo, kila pynlong ia ka jingiaid paidbah na Tura Circuit House sha Ophis u Deputy Commissioner bad aiti ia ka dorkhas ba un pynpoi sha ka Sorkar Jylla.
Kine ki Nongtrei kila dawa ba baroh ki Nongtrei kim dei ban shah ot ia ka tulop hadien ka rai ban pynkylla ia ka rukom treikam jong ka Mission. Kiba bun ki Nongtrei ki la pyntip ba kila ioh ia ka tulop kaba kham rit na kaei kaba ju ioh baroh shikatta hadien kane ka jingpynkylla ia ka rukom treikam.
Kine ki Nongtrei kila dawa ruh ia u Mission Director ka NHM ha Jylla ban pynkylla biang ia ka draft bala mynjur haba iadei bad ka jingsiew tulop ia ki nongtrei da kaba shim jingkhein kat kum ka kyrdan pule ba kila pyndep bad ka kam ba ki trei nalor ka jinglut jingsep ba manla ka sngi.
