Shillong, Naitung 05 : Hadien ba ki khubor ki la phriang kylleng ba arngut ki MLA jong ka HSPDP kin sa leit ban iakhun noh na kiwei pat ki party ha ka elekshon ban wan, na ka liang u President ka Party Bah K.P. Pangniang um shym la kyntait ne pdiang hynrei u shu ong ba kane ka ju jia beit ha man ki party haba la jan ka elekshon MLA.
“Ngim sngewphylla shuh namar kane ka ju jia man ka por ba ka jingiamih jong ki MLA na ka party jong ngi ka la ju jia beit naduh mynshwa bad ki la ju ong ruh ba bunsien ba kane ka party kan duhbor haba ki mih hynrei ban ong ba kan ktah ba ka party jongngi kan duh bor ne kan ioh duna noh ki MLA te kata te kam dei,” ong u President.
Da kaba kdew ba kiwei ruh ki party mynta ki la iabit lang ia katei ka jingpang kynthup ka Congress, ba ki MLA kin ia mih ban leit sha kawei pat ka party, u ong ba mynta kim sngew phylla shuh namar ki la myllen.
Ha kajuh ka por, u ong pat ba haduh mynta hi, watla kitei ki khubor ki la phriang hynrei ki arngut ki MLA kata u Bah Samlin Malngiang ba dei MLA ka Sohiong bad Bah Renikton Tongkhar MLA ka Mawkyrwat haduh mynta kim pat pynpaw satia ba kin iehnoh ia ka party.
“Kumta, katba kim pat resain ne ai da ka jingthoh ba kim don shuh ha ka party, ngi dang shim beit ba ki dei ki MLA ka HSPDP.”
