Ka Thma kam pat kut katba ngim pat ioh ia ka 5% ka Increment, ong ki NonghikaiAdhoc

Date:

Share post:

Shillong, Naitung 05: Ka Federation of Adhoc School Teachers of Meghalaya (FASTOM) hynne ka 5 tarik u Naitung kala shim ia ka rai ba kan pynsangeh iaka jingiakhih ka jong ka hynrei kan leit pat ban iakren bad ka sorkar jylla halor ki mat jingdawa ki bym pat seisoh haduh mynta.

U Nongaiktien ka FASTOM u Bah Mayborn Lyngdoh u la ong, “Ki nonghikai kim sngewhun ne sngewkmen ia ka jingpynbna ka sorkar jylla halor ka jingpynkiew iaka tulop kata T.9000 bad T.6000 ia ki nonghikai skul, hynrei ngin ym kyntait pat ia kaei kaba ka sorkar ka ai, namar ka jingiakhun ban dawa iala ka hok kam pat kut”.

U la ong, ka FASTOM kan leit ban iakren bad u Myntri Rangbah ka jylla u Conrad K Sangma ban phah pynkiew tulop 5% man la ka snem bad ban kyrpad ba dei ban kyntiew sa mar T.2000 ia ki nonghikai Lower Primary khnang ba kine ki nonghikai kin ioh iaka tulop ka ban kot sha ka T.20,000 shi bnai.

“Ngi dang ieng skhem beit haka nongrim kumba ngi la dawa baroh shi katta ba ka sorkar kadei ban pynkiew tulop T.18,000 ia baroh ki nonghikai Adhoc bad kumba long mynta ngi dang jop tang iaka jingialeh hynrei ka thma kan dang iai bteng” ong u Mayborn.

Haba ai jingkren haka jingialang paidbah u Mayborn u la ong, “Ka pisa kaba ngi ioh mynta, ngi dei ban shim namar kadei ka jingjop kaba ngi lah pyni sha ki khynnah ba kin tip haba ki kwah ia kaei kaei kidei ban ieng ban dawa ym ban rieh hynrei kidei ban ïeng hala ka hok bad ka don ka aiñ kaba iada ia ngi”.

U la kyntu ia ki nonghikai ba kim dei ban leit sha la ïing da ka jingsngewsih hynrei ki dei ban leit da ka jingkmen namar ka sorkar kala pynpaw ba kan sa khmih ia ka jingdawa ban kyntiew tulop 5 % man la ka snem bad kin sa leit iakren bad ka sorkar jylla halor katei ka bynta.

“Ngi lah ioh iaka jingjop bad ynnai pyrkhat tang iaka pisa hynrei pyrkhat ruh na ka bynta ka lawei jong ki Khynnah” ong u Mayborn.

Share post:

spot_img
spot_img

Popular

More like this
Related

Kylla iingjah ka Iew Dohkha ha Saiden wat hadien 3 snem ba dep tei, bijai ei T. 1.44 klur

Shillong, Risaw 02 : Ka jingjied khlem da bishar...

Rai ka KAS ban leit pan jingshai na u Amit Shah halor ka dorkhas ban ai jingithuh ia ka Ktien Khasi

Shillong Risaw 02: Ka Khasi Authors’ Society (KAS) kala...

Pyni nuksa ki BSF ban lehkhuid da ka jingrakhe ia ka Swachhata Hi Sewa

Shillong Risaw 02: Kum shi bynta ban wanrah ia...

Plie ka Nongthymmai ia ka jaka leitbar paidbah ban pynsah jingkynmaw ia ka Gandhi Jayanti

Nongpoh, Risaw 02: Ka Dorbar Shnong Nongthymmai jong ka...