Shillong, Nailar 17: Ki Hospital ha kylleng ka Jylla Meghalaya hynne ka sngi siatjain, kila sangeh 24 kynta ïa ka jingai jingshakri ha ka Outpatient Department (OPD) bad ki non-emergency kaba la sdang naduh ka step sngi Saitjaiñ.
Ïa kane ka jingsangeh treikam la leh kum shi bynta ban pyrshah jur halor ka jingshah leh bei-jot bad shah pynïap ka doktor ba dang shah hikai ha RG Kar Medical College and Hospital ha Kolkata.
Hapoh ka Hospital NEIGRIHMS, ki nonghikai, ki doktor, ki samla pule MBBS, bad ki samla pule Nursing kila ia lum lang hynne ka step ban pynling ia ka jingïakhih ba jai jai.
Ia kane ka jingïakhih la pynlong kum ka jingïatylli bad ka jingïakhih ha baroh kawei ka Ri ïa kaba la pynlong da ka Indian Medical Association (IMA).
U Dr. Indranil Banerjee uba dei ruh u General Secretary ka North Eastern Indira Gandhi Regional Institute of Health & Medical Sciences-Resident Doctors’ Association (NRDA) ha ka kyrwoh, ula ong ba ka jingiakhih kadei ban pyrshah ia ka jingjia kaba shyrkhei bad ka jingshah lehbeiñ da ki hajar ngut ki doktor kynthei kiba sah kiba trei ha kylleng ka Ri.
“Ka jingshngain na ka bynta ki nongtrei ka koit ka khiah kala long ka mat kaba kongsan la bun snem, bad kane ka jingjia kala long ka jingpynkylla. Ngi don hangne ban pyni ia ka jingkyrshan jong ngi iaka ka Doctor bad ban pynbor ban don daki aiñ iada kiba kham khlain, kum ka Central Protection Act na ka bynta ki nongtrei ka koit ka khiah” ula ong.
Ka NRDA ka la dawa ruh ia ka jingtohkit kaba khuid bad ka hok na ka bynta ka lanot bad ka la dawa ruh ban mynjur kloi ia ka Central Protection Act na ka bynta ki nongtrei ka koit ka khiah ha Parliament bad ban pynthikna ka jingshngain ha ki jaka trei, ha ki jaka sumar na ka bynta baroh ki nongtrei ka koit ka khiah.
Ka Bethany Hospital ruh hynne ka sngi, kala pynsangeh ïa ka jingshakri jong ki OPD ha ki tnat treikam jong ki ha Shillong, Nongpoh, Umsning bad Byrnihat, kumjuh ruh ka Supercare Hospital ruh kala khang ïa ka jingtreikam jong ka OPD na ka bynta 24 kynta, haduh ka por 6 baje mynstep haduh 18 tarik.
U Dr. Kyntiewlang Sanmiet, u Nongaiktien ka Bethany Hospital ula bynrap ruh ba ka jingïashim bynta jong ka Bethany Hospital ha kane ka jingïakhih bad ka jngthang mombati kadei ban pynpaw ïa ka jingsngewkhia lang jong ka hospital na ka bynta ka jingshngaiñ bad ka jingbha jingmiat jong baroh ki nongtrei ka koit ka khiah.
Ka Hospital kala kyntu ïa ki paidbah ban sngewthuh ïa ka jingdonkam jong kane ka kam bad ban kyrshan ïa ki katba ki ïasaid na ka bynta ka jingïada kaba kham bha bad ka jingburom ïa kito kiba aiti ïa la ka jingim ban pynim ïa kiwei.
Ha Mawkyrwat, Jowai, bad Shillong Civil Hospital ki Doctor kila kiar na ki kam OPD, watla ki lad jingiarap kyrkieh ki dang iai bteng ban treikam na ka bynta ki nongpang kiba donkam jingiarap.
Ki doktor sorkar ha kylleng ka jylla Meghalaya kila pynlong ruh ka jingiakhih da ka deng ia u Badge Iong (Black Badge).
La sakhi ruh ba ki doktor kiba dei ki dkhot jong ka Meghalaya Medical Services Association (MMSA) kila ïashimbynta ha kane ka jingïakhih kum ka jingïatylli bad ka All India Federation of Government Doctors’ Association (AIFGDA).
