Shillong, Rymphang 03 : Ka Iingkashari Meghalaya High Court kala pynkynriah tarik ia ka mukotduma ba iadei bad ka jingpynkynriah ia ki 342 tylli ki longiing na Them Metor, Them Iew Mawlong.
Ka Iingkashari bala khlieh da u Justice B Bhattacharjee kala pynmih ia kane ka hukum haba shong bishar ia ka mudui bala ujor da ka Harijan Panchayat Committee pyrshah ia ka High Level Committee da ka Sorkar Jylla, ha ka sngi Nyngkong.
Ka Iingkashari kala pynsangeh shuwa ia kane mukotduma na ka bynta saw taiew, haba pynpaw b aka don ka mukotduma ba don jingiadei bad ka, kaba dang sahteng ha Iingkashari Division Bench.
“Ki nongiasaid ain ba mihkhmat ia ki liang mamla kila pyntip ia ka mukotduma ba iadei bad kane ka kam, kaba sahteng hapoh ka Division Bench. Namar kata, buh noh ia kane ka kam hadien 4 taiew” ong ka Iingkashari ha ka hukum.
Ha ka 29 tarik Kyllalyngkot, u Symbud Myntri Rangbah ba khmih ia ki kam pynroi sor Bah Sniawbhalang Dhar ula pyntip ba ka Sorkar kan sa pynlong ia ka jingialang bad ka Harijan Panchayat Committee hadien ka Dorbar Mang tyngka jong ka Jylla, ban iakren halor ka jingpynkynriah ia ki 342 tylli ki longiing na Them Metor, ha Them Iew Mawlong.
