Shillong Nailur 03: Ki Saw tylli ki Shnong jong ka Ri-lum Jaintia kiba don ha khappud bad ka Ri Bangladesh, kila pynkynmaw ia ka Sorkar Jylla ia ka rai ba kin ‘Boycott’ ne ym leit iashimbynta ha ka elekshon MLA-2023 ban long ha Jylla lada ka Sorkar kam shimkhia ban pyntrei noh mardor ia ka surok jong ka thain.
Kine ki saw tylli ki Shnong ki kynthup ia ka shnong Huroi, Hingaria, Lailong bad Laijri, kiba hap hapoh ka Sutnga Consti-tuency, East Jaintia Hills District.
Ia kane la pynpaw da u Rangbah Shnong ka Huroi Bah Golden Marbaniang haba iathuh ba ka Sorkar Jylla dang shen kala pyntip ba kala dep ban mang ia ka song pisa ba T. 126 klur ban shna noh ia ka surok sha kine ki Shnong khappud, kaba haduh mynta kam pat paw dak satia.
“Ha ka jingiakynduh jong ngi ki Nongialam Shnong ia u Symbud Myntri Rangbah ba khmih ia ka Tnad PWD (Roads) Bah Prestone Tynsong, ula pyntip baka Sorkar kala mang T.126 klur ban shna noh ia ka surok hapoh ka thain bad ka Tnad PWD kala dep ruh ban aiti ia ka Work Order sha ki Contractor ba kin sdang trei noh ia ka surok ha ki bnai tlang jong une u snem” ula iathuh.
“Ngi la ap la bun snem ban ioh ia ka surok bad ngin sa peit la ka jingshna ia ka surok ka long ne em kumba la kular. Ka rai jong ngi hi ka dang ieng haduh mynta ba ngin ym iashim bynta ha ka elekshon lada jia ryngkat ba ngim iohi satia ia ka surok hashuwa ka elekshon” ula ong.
Une u Nongialam Shnong ula pynkynmaw ba ka rai ban nym iashimbynta ha ka elekshon MLA-2023 ka dei kaba la shim na ka rally paidbah jong ki saw shnong kaba la pynlong ha Khliehriat ha u snem 2020.
“Ngi la pynbna ha kane ka Rally ba lada ka Sorkar kam lah ban ai ia ka surok kaba paka hashuwa u snem 2023, ngin leit tur syndon wat sha Secretariat ban dawa iala ka hok” ula pynkynmaw haba bynrap “Ngi lah rai ruh ba lada kam pynshna noh ia ka surok, ngin ym iashim bynta shuh ha ka elekshon MLA-2023”.
Kane ka rally ka dei kaba la pynlong da ka Joint Action Committee jong kine ki saw tylli ki Shnong, ia kaba la thaw ba kan long ka tynghung sawa sha ki tyndong skhor ka Sorkar ba kan khmih bad peit lem ia ka jingeh jong ki paidbah ha kine ki shnong khappud.
Kine ki saw tylli ki Shnong kiba don ha khappud ka East Jaintia Hills bad ka Ri Bangladesh, kila mad ia ka jingim ba sohsat tam kham tam ha ka leit ka wan mynta da ki phew phew snem namar ka jingbym ioh ia ka surok rong. Ki paidbah haduh mynta ki dang hap iaid ha ka surok khyndew bad ba ktieh kum ka ahor ha ka por lyiur.
“Naduh u snem 1992, ngim shym la ioh satia ia ka surok kaba biang bad ka thain kala sahdien ha kiba bun ki liang namar ka jingbym don ba iohi ne iarap khamtam na ki nongmihkhmat ka thain” ong u Bah Golden Marbaniang.
“Ki Nongialam Shnong kila leit ud leit nam ka bym lah niew shuh sha u Nongmihkhmat hynrei la aidaw ba tang namar ba kim don ha ka Sorkar ne ha ka bor, kim lah satia ban leh eiei. Namar kane, ngi ki paidbah ngi la shu mad ia ka jingsyrtok ha ka leit ka wan khamtam ha ka por ba pang ba shitom” bynrap u Rangbah Shnong.
