Shillong, Nohprah 05 : U Myntri Rangbah ka Jylla Conrad K Sangma ha ka sngi Ba-ar, ula pyntip ba ka Sorkar Jylla kala pynkylla ia ka rukom treikam ka Meghalaya Public Service Commission (MPSC) bad ia ka rukom thungkam baroh da kaba thaw ia bun ki Recruitment Board ban pynsted ia ka rukom thungkam.
Haba iakren bad ki nongthoh khubor, u Conrad ula ong “Ngi la pynkylla ia ka rukom treikam ka MPSC bad ka rukom thungkam baroh kawei da kaba pynkha kham bun ki Board. Kane kan pynkloi ia ka rukom thungkam”.
“Ha ka por ba mih ka Health Recruitment Board, ka jingthungkam ia ki doktor kaba la sahteng haduh 5 snem, la lah ban pyndep tang 3 bnai da ka jingpynkha ia kane ka Board ba thymmai” ula bynrap.
U Conrad ula ong ba ka jingthmu hi ka long ban pynthikna ba ka rukom thungkam thungjam kan iaid beit iaid ryntih.
“Khnang ban pynthikna ba ki jingthungkan kin iaid beit iaid ryntih, ka jingpynkha ia ki Board bapher bapher kan ailad ban pyntreikam bad thungkam mar mar bad kaei kaba ngi leh mynta ka dei shibynta jong ka jingpynkylla” ong u Conrad.
U Myntri Rangbah ula ong ba ki don ruh ki skul Sorkar, ki Higher Secondary School kiba hap ban thung ia ki Principal bad ka kam kala sahteng lah san snem bad ka MPSC kala hap ban kit ia ka lyngkor ba khia bad khnang ban pynthikna ba kam dei ban slem ka jingthungkam, ngi la sdang ban thung ia ki board ba thymmai ban pynkylla ia ka rukom thungkam.
