Shillong, K’lyngkot 15 : Ka kynhun Myntri ka Sorkar ha ka sngi Balang kala mynjur ia ka kyndon thymmai jong ka Meghalaya State Investment Promotion & Facilitation Act, 2024, kaba thmu ban pynthikna ba kan ym don ka jingiaid lait ia ka Meghalaya Land Transfer Regulation Act, 1971, haba pynshlur ia ka jingkynshew kam hapoh ka Jylla.
“Ngi la weng ia ka para 34 da kaba bynrap ia kane ka lain ba kane ka Act kan nym lah ban iaid lait ia ka Meghalaya Land Transfer Reguational Act, 1971” ong u Myntri Rangbah ka Jylla Conrad K Sangma haba iakren bad ki lad pathai khubor hadien ka jingialang.
Ula pynbna ruh ia ka rai jong ka Sorkar ban pynkylla kyrteng ia ka Investment Meghalaya Agency (IMA) kum ka Meghalaya Investment Promotion Authority (MIPA) lyngba ka kyndon ba thymmai.
“Ka jingthmu ka long ban ai ia ka kyrteng kaba kham sngewtynnad ia kane ka Agency namar ngi tip b aka Act dalade ka dei kaba la khot ka Meghalaya State Investment Promotion & Facilitation Ordinance bad kumta haba iaid kat kum ka Act, ngi la khot ia kane ka bor treikam mynta kum ka MIPA ha ka jaka ka IMA” bynrap u Myntri Rangbah.
U Conrad u pyntip ba ia kane ka rai la shim ha ka jingialang ba dang shen bad ka kynhun na Khasi Hills Autonomous District Council (KHADC) bala ialam da u Chief Executive Member (CEM) Bah Pyniaid Sing Syiem, kaba la pynpaw ia ka jingsngewkhia halor kane ka kam.
Ula pyntip ba ka Sorkar kala rai ban pynrung ia ki jingai jingmut jong ka KHADC, kaba kynthyp ia ka jingpynkylla ia ka para 34 jong ka Act.
“Nga kwah ban pynshai ba kane ka clause Article 34 ka dei beit halor ka common application form. Mynshuwa, ka Single Window Agency (SWA) ka donkam ia ki katto katne ki aplikeshon ba hap phah she ki ha ki katto katne ki phorm, ka MUDA ka donkam ia ki aplikeshon hala ki jong ki phorm, ka MTDC ruh ka donkam hala ki jong ki phorm bad kumta, ban kiar ia ka jingpynkylla ia baroh kine ki 6-7 act bad ban pynrung ia ki kyndon jong kane ka Act, ngi la wanrah ia kane ka kynhun ha ka Act ka ban pyniap noh ia ki kyndon jong kito ki kyndon barim. Nga shu kwah ban pynshai hynrei naba kala wanrah ia ka jingkulmar jingmut ha ki District Council bad ki riew paidbah, ka Sorkar kala rai ban pyndam noh ia ka article lane para 34 jong kane ka Act, kaba la pynkha ia ki jingkulmar jingmut baroh” ong u Myntri Rangbah.
Haba pynpaw ba ia kane ka Act la mynjur khnang ban pynsuk ia ka jingwan kynshew kam ha Meghalaya, u Conrad ula ong “Nga la pynshai ha ki por bala leit noh ba mynshuwa ka ju don ka Single Window Agency, kaba khmih ia ki project kynshew kam hapoh ka Jylla hynrei namar ka jingnang iar jong ki kam, kaba kynthup mynta ia ki kam ha ka koit ka khiah, ka kam rep, ka kam jngoh kai, ka IT, ka kam pynmih bording bad ka kam karkhana, ka jingkynshew kam kala kham iar bad kumta ngi donkam ia ka bor kaba kham iar ha ka jingtreikam ka ban khmih ia kine kiei kiei bad dei kane kaba lam sha ka jingmih jong ka Investment Meghalaya Agency (IMA) ha katei ka por. Kumta la mynjur ia kane ka Act”.
Ula bteng “bad mynta ngin sa pynkylla ruh ia kiwei ki kyndon kiba don hapoh ka Single Window Agency, ka Promotion Policy lane ka Tourism Act lane kiwei ki Act, kiba la shah ktah ha kane. Ngin sa wanrah ia ki jingpynkylla kiba donkam bad weng noh ia ka para 34 ban kiar na ki jingpynkulmar jingmut hapdeng ki paidbah. Ula ong ba kane ka Act da leilei ruh kan nym iaid lait ia ka Meghalaya Land Transfer Reguation Act, 1971”.
Halor ka jingsngewkhia ia ka para 13 jong ka Act, u Conrad ula ong “Kane ka paragraph kaba kren beit thik ba lada ia ki phorm ne jingsiew ki dei kiba hap pyniaid ban ioh jingbit kat kum ki ain ka Sorkar Pdeng, ia ka aplikeshon yn hap ban phah sha ka Sorkar Pdeng. Kumta khang ban pynthikna ba ngi shimkhia ia ki jingsngewkhia jong ka KHADC bad kiwei kiwei ki dkhot, ngi la pynrung sa kawei ka paragraph ba ong ba lada don ki phorm ne jingsiew kiba hap ban buh ia kaban ioh jingbit na ki ADC, ia kine ki aplikeshon dei ban phah sha ki ADC ha ryngkat ki jingsiew”.
“Ia ki jingbit na ki District Council dei ban aplai hi na ki District Council. Naba ka mih ka jingkulmar jingmut halor kane ka bynta, ngi la wanrah ia ka paragraph ban pynshai ba ia ki aplikeshon,ki jingbit, baroh ki NoC haba donkam na ki ADC, ki dei ban iaid lyngba ki ADC” ula ong.
Nalor kane, u Myntri Rangbah ula pyntip ba ka Sorkar kala pynrung ruh ia kawei ka para ha kane ka Act, kata ka long ba dei ban pynlong kongsan ha kaban thungkam ia ki trai shnong.
