Pynkut noh ka iingbishar ia ka PIL pyrshah ia ka Amrit Cement

Shillong Nailar 01: Ka Meghalaya High Court kala pynkut noh ia ka public interest litigation (PIL) ha kaba iadei bad ka jingkynnoh pyrshah ia ka Amrit Cement Industries Limited, East Jaintia Hills District ba kala tih be-aiñ ia u mawshun.

Ka Division Bench kaba kynthup ia u Chief Justice IP Mukerji bad u Justice W Diengdoh ha ka hukum kaba kila pynmih hynne ka sngi Thohdieng kala bthah ia ka sorkar jylla ban long kaba peitngor bad ban pynthikna ba ka kompani ban bud ryntih ia ki kyndon katkum ka jingioh ia ka lisen ban tih.

“Hadien ka jingaiti ia ka jubab, ka kaiphod kaba la ai da ka sorkar jylla bad ka nongrim kaba ieng da u Chief Secretary, ngi bthah ia ka sorkar jylla ba kan long kaba peitngor ban pynthikna ba ka lisen kaba la ai sha uba don mamla ne Respondent No.9 (Amrit Cement Industries Limited) kadei ban pyntreikam thikna bad kam dei ban donkti ha kaban tih be-aiñ ia u mawshun” kala ong.

“Man la ka 3 bnai u Chief Secretary ne uno uno u ophisar uba la shah pynkup bor ha u, yn ai ia ki jingpyntip hadien ba la dep pynlong ia ka jingtohkit kaban pynmih ha ka website jong ka sorkar ba u Respondent No.9 u bteng ne ym shim la bteng ban tih ia u mawshun katkum ka jingai ia ka lisen, na ka bynta ka jingtip jong kino kino ki paidbah ne ki briew kiba don ia ka mynsiem kiba lah ban don ia ka jingsngewkhia ban pynthikna ba ym dei ban don kano kano ka jingtih be-ain ia ki marpoh khyndew hapoh ka jylla” la bthah ka iingbishar.

Ia katei ka PIL la mudui da u Ranjit Chandra Goswami bad la kynnoh ba ka Amrit Cement Industries Limited kala donkti ha ka kam ban tih be-aiñ ia u mawshun khlem da ioh ia ka jingbit.

Ka kompani kala ioh ia ka lisen ban tih mawshun ha ka 11 tarik u Iaiong 2023, hynrei u nongmudui ula kam ba ka kompani kala tih mawshun be-ain wat hashwa bad hadien ba la ioh ia ka lisen.

Ka Division Bench kala shem ruh ba ka kaiphod jong ka sorkar jylla kaba la pynbna ba ka Amrit Cement kam shym la leh bakla katkum ka jingshah kynnoh. Hynrei u nongmudui ula iakhun pyrshah ia kane ka jinglap, kaba la pynlong ia ka iingbishar ban pan shuh shuh ia ka jingpynshai.

U Advocate General ula kyrshan pura ia ka rai jong ka sorkar jylla kaba ong ba shwa ban ioh ia ka lisen ha u snem 2023, ka kompani kala shu thied ia u mawshun na ki nongdie shimet ka jylla. Kane ka rukom die ruh kadei kaba iaid katkum ka aiñ.

U Advocate General ula pynpaw ba katkum ki jingtip jong ka sorkar, ka kompani kam shim la donkti eiei ha kaban tih be-ain ha kano kano ka por la ka long hashwa ne hadien ba la ioh ia ka lisen.

Ka iingbishar kala shimkhia ia ka jingpynpaw jong u DK Banerjee, Senior Advocate uba la mihkhmat ia ka kompani uba la pynpaw ba ka kompani kam shym la sdang satia ia kano kano ka jingtih hynrei shen kan sa sdang noh.