Shillong, Naitung 13: Ha ka sngi ba khatduh jong ka sien wan iuhkjat ba saw sngi ha Meghalaya, ka Myntri Pla Tyngka ka Ri Nirmala Sitharaman, kala leit ban iuhkjat ha ka skul Ramakrishna Mission Ashram kaba don ha Sohra.
Ha kane ka jingleit iuhkjatm ka Myntri kala buh syntiew ha u mawmot jong u Swami Ramakrishnanda bad Swami Vivekananda.
La pyni ruh ia ka ia ki jaka ai jinghikai Vocational ka Mission, ha kaba kumba 100 ngut ki kynthei kiba ioh ia ka jinghikai ban thain jain khlem kano kano ka jingsiew.
U Swami Anuragananda, Secretary ka Ramakrishna Mission Sohra, ula iathuh ba ka Myntri kala tip bha shaphang ki kam jong kane ka jaka pule.
“Kum kawei na ki Centre bala rim duh ha ka thain Shatei Lam Mihngi, ka kwah eh ban tip halor ka histori, ka jingkiew shaphrang bad ki jingtynjuh ba ka Mission ka iakynduh mynta, bad kumjuh ruh ia ki kam bapher bapher ba ka leh” ula ong.
“Kala pynpaw ia ka jingkwah eh ban iakynduh ia ki nongsengkam kynthei bad ka sngewkmen bha halor ki kam pynkupbor hapoh ka campus” bynrao u Swami.
Ka Sitharaman kala kylli pyrthew ruh ia kiba bun ki samla pule ba paw jong ka Ramakrishna Mission. U Swami ula pynkynmaw ia ki kyrteng ba pawnam ka Jylla kum u Bah BB Lyngdoh, Myntri Rangbah barim ka Jylla bad u Kpa ka sain hima khleh khaw lang ha India, u Bah GG Swell, u MP ba pawnam, u Bah Donkupar Roy bad kiwei kiwei ki Nongialam, ki Heh Ophisar kiba la saindur da ka Mission.
Ban pdiang ia ka Myntri, bun ngut ki kynrem ki lyndan kila don ha kane ka sngi ba kynthup ia ka President ka Skul Kong Theilin Phanbud kaba la ioh ia ka Padma Shri ha u 2006 bad kiwei kiwei.
Lah ban kdew ba ka skul Ramakrishna Mission, Sohra, kala dap dang shen ia ka 100 snem ha ka jingai jingshakri ha ka thain. Ka Sitharaman kala thung dieng ruh hapoh ka campus ban pynkut ia kane ka jingleit iuhkjat jong ka.
Kiwei kiba la iadonlang ki kynthup ia ki Nonghikai bad ki Nongtrei barim kynthup ia I kong Lolin Lyndem, iwei na ki samla pule bala rim duh, iba la kynjoh 90 snem bad iba la long kum I Khynnah skul bad I Nonghikai kane ka skul.
