Nongstoiñ, K’lyngkot 7: Ka Mawrusyiar Youth & Cultural Club ka la pynkut noh їa ka jingrakhe jubili ksiar halor ka jingdap sanphew snem ha ka sngi saitjaiñ ba la dep.
Ia kane ka jingrakhe la pynlong ha madan jong ka shnong lyngba ki jingialehkai ba bun jait bad la pynshongkun ia ka da ka jingiadon ryngkat u MP ka Shillong Vincent H Pala ha ka jingdonlang u MLA ka Rambrai-Jyrngam RG Momin.
Kum ka dak ban pynsah jingkynmaw, ka Club kala plie ruh ia u mot sah jingkynmaw bad pyllait ia ka souvenir nalor ka phlim lyngkot ne documentary kaba pyni ia ki kam ba ka Club kala trei ban kyntiew ia ka bha ka miat jong ka Shnong bad ka imlang sahlang.
Haba ai jingkren, u MP u la ai ka jingїaroh їa ki nongїalam kiba seng їa ka Club bad kiba la btin lynti їa ki samla ba kin lah ban kynjoh sanphew snem ha ka jingtreikam jong ka.
U la ong ruh ba haba їanujor їa ka jinglong jingman ha ka imlang sahlang, ka Jaitbynriew Khasi Pnar ka dei ka jaitbynriew kaba kyrpang tam napdeng ki jaitbynriew jong ka pyrthei baroh, namar ha kiwei pat ki ri ka pyrthei, ym ju kham lap koit ba ki samla kin wan shakhmat ban trei na ka bynta ka jingbha jong ka shnong ka thaw bad ban btin lynti lem їa ki samla kiba kham hadien.
Ia kane ka jingrakhe la pynkut da ka rynsan iaput iatem jong ka kynhun Kid’s Tarari, Thunder’s Cave bad Snow White kiba la pynkmen bad pynshongshit їa ki paidbah kiba la wan ha katei ka madan.
