Shillong, Kyllalyngkot 07: Ka Meghalaya kala pynrem kput iaka Arunachal Pradesh da 172 run ha ka jingiakhun ia ka Ranji Trophy kaba la long ha Anand, Gujarat hynne ka sngi u Blei.
U Dippu Ch Sangma ula shim 5 wiket bad ai 54 run, ha kaba ka Arunachal kala kamai 238 run bad hap lut ki nongtied ha ka jingleit tied ha ka sien ka baar.
Kane kadei ka sien kaba nyngkong ba u Dippu yn shim haduh 5 wiket ha ka jingiakob ialehkai Cricket kaba la pynlong da ka BCCI bad ula shim ruh 4 wiket bad ai 18 run ha ka jingleit kawang bol ha ka sien kaba nyngkong ne First Innings bad haba khein kyllum ula ioh khur 9 wiket bad ai 72 run.
Kumban shu pynkynmaw ka Arunachal, kala leit tied nyngkong bad kala kamai tang 94 hynrei haba ka Meghalaya kala elit ban tied kala kamai 504 bad hap tang 9 wiket ha kaba u kapten ka Meghalaya u Kishan Lyngdoh ula thaw syndon iaka histori kum u nongialehkai uba nyngkong eh jong ka Meghalaya ban kamai 268 run ne Double Century ha ka Ranji Trophy.
Nalor ka jingialehkai bha u Kishan, la sakhi ruh ba u Ram Gurung ula kamai 123 run bad kane ka dei ka sien kaba nyngkong eh ia u ban kamai iaka Century bad kadei ruh ka sien kaba nyngkong eh ia u ban ialehkai haka Ranji Trophy.
U President ka Meghalaya Cricket Association u Nababrata Bhattacharjee ula ai khublei ia u Dippu Sangma uba la shim 5 wiket bad ula ai khublei ia baroh ki nongialehkai halor ka jinglah ka jongki ban pynrem ia ka Arunachal Pradesh.
Kiwei pat ki nongkawang bol ka Meghalaya kiba la ioh khur wiket ki kynthup ia u Md Nafees uba la ioh 2 wiket, u Ram bad u Arbin Singh nar shi wiket.
Ka Meghalaya mynta kan hap ban pynkhreh ialade ban iakhun pyrshah ia ka Hyderabad kaban sdang naduh ka 12 tarik u Kyllalyngkot ha MCA Ground Polo.
Ka Hyderabad dang shen kala pynrem ia ka Nagaland da 194 run.
