Nongpoh, Risaw 02 : Ka Raid Khat-ar Lyngdoh jong ka Nongpoh Elaka, kala pynkup ia ka spong ka phali ia u Rangbah Shnong bad u Secretary shnong ba pura jong ka Dorbar Shnong Saiden hynne ka sngi Balang.
U Myntri Stoin Syngkli ula shim ia ka bynta ban pynsong ia u Bah EK Lapang kum u Rangbah Shnong bad u Myntri H Namsaw ula shim ia ka bynta ban pynspong ia u Bah Evansis Jones Myrthong kum u Secretary ka Dorbar Shnong. Ha kane ka sngi la pynithuh ruh ia ki dkhot ka Executive Committee jong ka Dorbar Shnong.
Ha kane ka sngi, ka Dorbar Shnong Saiden kala ai burom ruh ia u samla Donkupar Kharlukhi, u wei napdeng ki samla shnong u ba la pyndep ia ka jingpule Pastor.
Haba ai jingkren, u Bah Stoiñ Syngkli, u la ai ka jingkitbok kitrwiang kaba skhem ia baroh arngut ki nongialam shnong kumjuh ia ki dkhot ka EC ba kin nang lah ban pyntyllun ia ki kam ha kaban pyniaid beit iaid ryntih ia ki kam shnong bad ruh ban kyntiew ia ka shnong ka thaw bad ban peit ruh ia ka bha ka miat nalor ka roi ka par.
U la pynkynmaw ruh, ba ki Rangbah Shnong bad Secretary Shnong ki dei ki nongialam shnong ba la ithuh kyrpang da ka Khasi Hills Autonomous District Council lyngba ka kyndon aiñ bad kane ka kam ka long kaba kyntang ym ka kam ialehkai khunjakai namar kum ki nongialam shnong ki don ia ka jingkitkhlieh kaba khia ban ialam bad ban peit ia ka shnong ka thaw ha kiba bun ki liang.
Ha kajuh ka por, ka Dorbar Shnong Saiden ka la ioh ruh ban shimbynta ha ka jingrakhe ia ka Gandhi Jayanti da kaba pynlong ia ka jingpynkhuid shnong ba la ia shimbynta da baroh ki nongshong shnong ban wanrah ia ka khuid ka suba ha ki sawdong sawkun baroh.
