Shillong Nailar 27: Ka Directorate of Housing hynne ka sngi Baar, kala pynlong ia ka jingialang pynkup burom ia ki Nongtrei ka Meghalaya State Housing Board kiba pdiang ia ka Voluntary Retirement Scheme (VRS), kum ka dak ka jingiakhublei kti khatduh ban khang khyrdep noh ia ka Board.
Ia kane ka jingialang la pynlong ha Ophis treikam ka Board kaba don ha Madan Laban.
Kane ka jingpynwai noh ia ka jingtreikam jong ka Housing Board kan treikam naduh ka 28 tarik u Nailar 2024.
Haba kren ha ka jingialang, u Chairman jongka Meghalaya State Housing Board u Bah Damanbait Lamare ula pynbna ba ka sorkar jylla kala shim ia ka rai ban pynduh noh ia ka Meghalaya State Housing Board, ia kaba ula shakri kum u Chairman ha kine ki shisnem shiteng tam.
U Bah Lamare ula pynpaw ia ka jngsngewnguh ia ki nongtrei baroh kiba la trei shitom bad ula pynpaw ruh ba kila don katto katne ki nongtrei kiba la shongthait noh na ka kam bad kila don ruh kiba la khlad noh ha ka por ba ki dang ai jingshakri. Ula banjur ba ka sorkar kala ai iaka jingiarap da ka song tyngka lyngba ka Voluntary Retirement Scheme, ban pynthikna ba ki nongtrei kin ym shah iehbeiñ khlem kano kano ka jingkyrshan.
Ha katei ka jingialang, u Bah Damanbait Lamare ula aiti ia ka cheque kaba dei ka Installment kaba nyngkong ia ki 18 ngut ki nongtrei kiba la pyndep ia ka jingai jingshakri kaba la palat ia ka 30 snem.
La wan ban iashimbynta ha katei ka jingialang da u Bah F.M Dopth uba long u Secretary ka sorkar jylla, ki heh jong ka Meghalaya Housing Department kiba kynthup ia u Bah Nongsteng, u Bah D Nongsiej bad kiwei kiwei.
