Pynkup burom ka Sorkar ia ka kynhun SRT | Pynbna u Myntri ban pyndait kor CCTV ha ki jaka jngohkai

Shillong Jylliew 11: Ka sorkar jylla ha ka sngi Balang kala pynkup burom ia ka Search and Rescue Team kiba la trei khlem shongthait ban lap ia ka met kaba la iap jongu Raja Raghuvanshi, ha kawei na ki jingjia kaba sngewtriem kaba la jia hapoh ka thain Sohra.

Ia kane ka jingialang la pynlong ha Conference Hall jongu SDO (Civil), Sohra, ban ai burom ia baroh ki riewshimet bad ki kynhun kiba la donbynta ha kaban leit wad ia u Raja Raghuvanshi bad ka jingdonkti jongka kurim ka jongu ka Sonam Raghuvanshi halor katei ka jingjia.

Haba kren ha katei ka jingialang, u Myntri ka kam jngohkai u Bah Paul Lyngdoh ula kyntu ia ki nongjngohkai ba kin wan da ka mynsiem bad ka jingmut jingpyrkhat kaba khuid bad ka maham ba yn ym lah pat ban pdiang ia kino kino ki jingleh kiban pynmynsaw ne ki jingleh kiba be-ain.

Ula kyntu ruh ia ki trai shnong ba kidei ban long kiba don akor bad kiba don ruh ia ka jingkitkhlieh ha kaba iadei bad ka kam jngohkai.

”Ka Sohra kadei ka jaka jong ka jinglong kaba khuid bad ka jaka kaba don ia ka burom kaba bha. Watla kala mad ia ki jingkynthoh ki bym don nongrim ha ki briew kiba na shabar, hynrei ka jaidbynriew ka jong ngi kala iengskhem bad iaid da ka rally kaba jai-jai bad ka jingthang mombati ha ryngkat bad ka jingkyrshan ban pynlong ia ka jingwad kaba long kaba eh bha” ula ong.

Ula pynbna ruh ba ka tnad jngohkai bad ki bor synshar ha Sohra ban pyndait ia ki kor CCTV ha ki jaka jngohkai kiba kongsan bad ula kular ruh ban bhah tyngka na ka bynta ban tei ia ki jaka die na ka bynta ki nongdie madan hajan ka Jingkieng Mawkdok, kaban kyrshan ia ka jingdonkam jong ki paidbah bad ia ka rukom im jong ki trai ri.

Katba u Bah Gavin M. Mylliem u MLA ka Sohra, ula ong ba ki nongjngohkai ki long kum ki bahaiing kiba wan nabar bad ula banjur ia ka jingkongsan jong ka jingiatreilang hapdeng jong ka sorkar, ki Dorbar bad ki nongialam shnong ban pynkhlain ia ki sawdong sawkun jong ka kam jngohkai bad ula ai khublei ruh ia ka Meghalaya Police halor ka jingtbit ha ka rukom treikam bad ka jingsted ban shim ia ki sienjam.

U Bah T.W. Chyne, MDC ka Sohra, ula iaroh ia ki pulit ba kila lah ban pynurlong ia ka jingangnud jong ki paidbah bad ula banjur ia ka jingdonkam ban kynthup ia ki Guide bad ki nongniah taksi na ka thain ha ki kam kiba iadei bad ka kam jngohkai.

U Bah Cyril V.D. Diengdoh, uba long u Director ka tnad Tourism, ula pynsngew halor ka jingshimkhia kiba kongsan ban kyntiew ia ka kam jngohkai, kaba nyngkong ka Tourist Buddy Program kaban pyndonbynta ia ki trai shnong ha kaban ioh jinghikai ban shakri kum ki Tourist Guide bad ka MTIME App ka rynsan kaba kongsan kaba ki nongjngohkai kin hap ban rejistar ialade kaban dei ruh ka jingsam lang ia ki jingtip ha ka por kaba thikna bad ki pulit bad ki tnad sorkar na ka bynta ban kyntiew ia ka jingshngain bad ia ka jingdon ia ka jingkitkhlieh.

Katba u Bah E.R. Solomon na ka Sohra Region Tourism Association, ula pynpaw ia ka jingsngewlem ia ka iing ka sem kaba la duh noh ia la baieid bathoin bad ula kubur ia ka jingtrei shitom jong ki pulit, SDRF/NDRF, F&ES, Rangbah Shnong, Volunteer bad kiwei kiwei.

Ula banjur ia ka jingdonkam ban pyndait ia ki kor CCTV, ban pynbha iaka lain Internet bad ban don ia ka jingiatreilang kaba ryntih haba don ki jingjia kiba kyrkieh.

U Guide na katei ka thain samla Albert Pde ula pynpaw ia ka jingsngewkhia halor ka jingsniew jong ki surok, ka jingduna ha ka jingbuh ia ki jingthoh ne Signage bad ka jingtlot jong ki Mobile Network bad ula kyntu ia ki bor kiba dei khmih ba kidei ban shimkhia ha khmat eh ia kitei na ka bynta ka bha ka miat jong ki nongjngohkai bad ki trai shnong.

Ka song pisa kaba kot T.5.4 lak la sam sha ki 36 ngut ki dkhot jongka Tour Guide Association of Meghalaya kaba kynthup ia ka Central Body, Sohra Unit, Local Guides bad ka West Jaintia Hills Adventure Sports & Mountaineering Association ha kaba la ai ia ki mar T.15,000.

Ki nongtrei sorkar kiba kynthup ia ki Pulit, SDRF, Fire & Emergency Services, bad Administrative Staff, kila shah pynkup burom da kaba ai da ki syrnod jong ka jingai jingithuh ia ka jingtrei borbah ka jongki.

Ka jingtrei kaba khlem shongthait ka jongki kadei kaba la ioh ia ka jingiaroh na baroh bad la pynkut ia ka jingialang da kaba rai lang da baroh ban tei ia ka jingshngain, kaba ialam da ka imlang sahlang bad da ka jingkitkhlieh ia ka kolshor ha kaba iadei bad ka kam jngohkai hapoh ka jylla Meghalaya.