Ka Meghalaya Games kan Sa wan Sa hap Ri-Bhoi, ong ka Myntri Sorkar
Nongpoh, Rymphang 13: Ri-Bhoi District Sports Association (RBDSA)hynne ka sngi Ba-ar, kala pynkup burom ia ki 108 ngut ki rang bad ki thei ialehkai ka Ri-Bhoi District kiba ioh khur takma na ka lympung 5th Meghalaya Games bad ka Khelo India Youth Games ba dang shu dep shen.
Lah ban kdew hangne ba ka Ri-Bhoi District kala wan ha ka kyrdan kaba ar ha ka jingioh khur takma na ka lympung ialehkai 5th Meghalaya Games ba dang shu kut shen ha Tura. Ka Ri Bhoi District kala ioh khur 79 tylli ki Takma, kiba kynthup 27 tylli ki Takma Ksiar, 22 tylli ki Takma Rupa bad 30 tylli ki Takma Rnong.
Nalor kine ki nongialehkai, ka RBDSA kala pynkup burom ruh ia 4 ngut ki rang ialehkai phutbol ka District kiba mihkhmat ia ka Meghalaya sha ka Khelo India Youth Games-kaba la ioh rah ia ka nam kum ka Champioh ne ioh takma ksiar na ka lympung kaba long ha Tamil Nadu.
Ia kane ka jingpynkup burom la wan ban pynshongkun da ka Myntri Sorkar Kong Ampareen Lyngdoh ha ka jingiadonlang u Working President ka MSOA Bah John F Kharshiing bad kiwei kiwei ki kynrem ki lyndan.
Ka Dr. M Ampareen Lyngdoh haba ai jingkren, ka la ai iaka jingiaroh ia ka RBDSA kaba lah ban ai burom ia baroh ki samla ialehkai kiba la kyntiew iaka nam jong ka District bad iaka jylla hi baroh kawei haba kyntu ruh ba kam dei ban ieh noh iaki khun samla kiba don hapdeng ka jingialehkai hynrei ban kdup iaki khnang ba kin lait naka jingiaid sakma.
“Nga tip ba kum ka association ki don bun ki jingeh haka lynti iaid jong phi ban btin lynti ia baroh ki nongialehkai hapoh ka District, hynrei kum ka Myntri jong ka sorkar ngan iarap katba lah ban iakren sha kiba halor ban pynpaw iaki jingdonkam jong ka Association bad ban pynsting ruh iaki jingeh jong ki nongialam la association” kular ka Dr. Ampareen.
Ka Dr. Ampareen ka la ai pynpaw ruh iaka jingsngew kmen ba kum ka Myntri kaba don ruh ka jingieid iaki kam ialehkai sports ,kan ioh iaka lad ban ia don bynta lang ha kum kane ka sngi. Ka la kyntu iaki samla ba ki dei ban ïai tur shakhmat haka lynti iaid jongki kum ki nongialehkai dakaba ong ruh “Lada phi thrang ba phin nangkiew sha khmat haki kam ïalehkai, kum ki sports person kaba nyngkong phi dei ban don ïaka Decipline”.
Shuh shuh ka Dr. Ampareen ka la pyntip ba ha u snem u ban wan, ka Meghalaya Game kan long ha Jaiñtia Hills bad ka district Ribhoi ruh kan sa ioh iaka ka bynta ban pynlong ia kane ka lympung kaba heh bad naka liang ka sorkar kan hap ban phai khmat sha ka District ban pynbit pynbiang haka ba iadei bad ki tiar ialehkai bad ki madan ialehkai.
Kiba la iadonlang ha kane ka sngi ki kynthup ruh ia arngut ki thei ialehkai ba pawnam ha ka Jylla kiba kynthup ïaka kong Margaret Pathaw, International Gold Medalist haka jingiakop iakhun kti bad I Sr. Rose Mary Lyngdoh, National Rural Game Gold medalist haka jingiakop Kawang Javelin Throw.
