Shillong, Nohprah 07 : Ka Meghalaya Judo Association, ka la pynkup burom ia u samla Adric Lyngdoh Nonglait bad Larika Kharkylliang namar ka jingiohkhur ia ka takma rupa bad rnong haka Sub-Junior National Judo Championship 2025–2026 , ba long ha Lal Bahadur Indoor Stadium, Hyderabad naduh ka 16-20 tarik u bnai Naiiweng.
U Adric u la khur ia ka takma haka kyrdan iakhun kaba 66 kg, katba k Larika ka la khur ia ka takma rnong na ka kyrdan iakhun kaba 48 KG
Ka jingpynkup burom da ka MJA ka long da ka song pisa bad kumjuh ka song ba kyrpang ia u coach bad manager jong kane ka kynhun u Jonathan Larinsanga.
Ha kane ka jingialang, la wan ban ia sakhi lang da u bah John Lyngdoh ba dei u Working President,u Dipak Mallick, General Secretary; u Sujit Kumar Chanda, Joint Secretary jong ka MJA.
Na ka liang u bah John Lyngdoh, haba ai jingkren ha kane ka jingialang, u pynpaw ba u dap da ka mynsiem kaba kmen bad sngew sarong na bynta ka MJA bad kumjuh ia ka jylla, ha kaba u pyntip ba na ki phra ngut kiba la leit ban iashim bynta, kine arngut ki la wanphai sha la iing ryngkat bad kine ki takma.
Kumta u kyrmen ba kane ka jingjop kine ki arngut kan long ka jingai mynsiem ia kiwei pat ki khun samla ba kin nang imsngi ban pynkhreh pat ialade ha ka por ba ka jylla kan pynlong ia ka National Games kaba 39 ha u 2027.
