Shillong, Nohprah 07: Ka lympung ialehkai SSA Champions Cup 2025, kan jam sha ka semifinal, kaba la wan hadien ba ka Langsning FC, ka la mih madan da kawei pat ka sur bad ka rukom ialehkai kaba khlain haduh ba kan da lah syndon ban pynliem ia ka Mawkasiang da 6-0, ha ka jingiakhun kaba khatduh artad jong ka group A, kaba la long ha ka sngi Saitjain ha SSA Stadium, First Ground Polo.
Ha shwa jong kane ka jingiakhun, ka Nongkseh ka la lah ban pynliem ia ka Mawkriah West da 6-1, ha ka jingiakhun jong ka Group B
Kane ka jingjop kaba bun kol tam da ka Langsning FC mynta ka janmiet, ka la biang pura ia ka wat ba kan da lah syndon ba kan bat ia ka kyrdan kaba nyngkong naka group, kaba la wan hadien ba kan khur mar 10 point bad ka ML FT, kaba hangne ka jingiapher hapdeng kine ki ar kynhun ka long ha ka jingioh ban thep ia ki kol (goal difference kaba long +10 to +7).
Katba na ka liang ka kynhun ialehkai jong ka Nongkseh ban bat ia ka kyrdan ba nyngkong ka donkam haduh 9 kol, hynrei ha kaba kut ka la hap ba kan hun ka mynsiem ka jong ka ban neh noh ha ka kyrdan kaba ar ha ka Group B, kaba hangne, ka jingiapher biang ha ka jingiathep kol bad ka Shillong Lajong FC ka long +16 la +13.
Kumta ha kaba kut jong ki jingiakhun ka group, ka jingpyniakap ia ka semifinal ka long ba ka Langsning FC kan iakhun pyrshah ia ka Nongkseh SS&CC, katba ka Shillong Lajong FC kan iakhun pyrshah ia ka MLP FT.
Kine ki jinngiakhun kin long ha ka sngi Hatmajai bad sngi Balang jong ka taiew kaban wan ha ka por 4:30 janmiet.
Haba phai sha ki jingiakhun hi ka long ba Donlad Diengdoh (40’, 64’, 82’) u la lah ban ioh thep haduh lai tylli ki kol, kaban ai mynsiem bha ia u bad ia ka kynhun ialehkai jong ka Langsning FC ba kan khreh iakhun ia ka semifinal bad ia ki kol kiba sah pat ia ki la thep da Samuel Phawa (55′, 60′), hynrei ia ka kol kaba nyngkong ia ka Langsning ka dei kaba la thep ia ka da u Nelson Rymbai (32′).
Haba phai pat sha ka jingiakhun ka Nongkseh pyrshah ia ka Mawkriah West, u Chesterpaul Lyngdoh u la lah ban lam khmat ia la ka kynhun ban thep ar tylli ki kol (23’, 55’), ia kaba la bynrap lang pat sa ki kol kiba la thep lyngba u Kitboklang Pale (25’), Khrawkupar Jana (65’), Kynsaibor Lhuid (68’) bad Baiaikara Swer (84’)
Katba ia ka shi kol ban lait brut naka bynta ka Mawkriah West la thep ia ka da u Khainkupar Iawphniaw (79’).
Kumta wat lada dei tang ki kynhun ialehkai ka SPL bad First Division kiba la buh jaka pat ialade sha ka semifinal, hynrei ki kynhun ba dei na ka kyrdan iakhun jong ka Second, Third bad Fourth Division, lah ban ong ba ki la lah ban ia pyni ia katta ka buit ka bor ialehkai ka jong ki ha kane ka lympung jong ka Champions Cup, kaba khlem pep kiba bun hi na ki player kiba la ioh ban ialehkai ha kane ka lympung, kan iai neh sah junom la junom ha ka jingim ialehkai ka jong ki.
