Nongpoh, Naitung 26 : Ka skul Christian Higher Secondary School, Nongpoh, ha ka sngi Thohdieng, kala pynkup burom ia ka kynhun ialehkai phutbol U-17 ki Kynthei jong ka skul, kaba la ioh ban mihkhmat ia ka Jylla Meghalaya sha ka National-Level Subroto Cup 2024 ban long shen ha Nongbah Delhi.
Ka kynhun ialehkai phutbol U-17 ka skul Christian HSS kala ioh mihkhmat ia ka Jylla hadien ba kala ioh khur ia ka nam lahduh ha ka State Level Subroto Cup phinal kaba long ha ka 14 tarik Naitung ha madan SSA Stadium, Shillong.
La pynshongkun ia kane ka jingialang pynkup burom da ka jingiadonlang u MLA ka Nongpoh Bah Mayralborn Syiem, u MDC Bah Balajied Ranee, u Rangbah Shnong Pahamsyiem Bah J Lyngdoh bad ki Kmie Koa jong kane ka kynhun ialehkai.
U Bah Mayralborn Syiem ula noh synniang da ka song pisa a T.1 lak sha kane ka kynhun ialehkai phutbol ka skul kum ka jingaimynsiem bad jingkitbok kitrwiang ba kin lah ban ialehkai khambha shuh shuh ha nongbah Delhi.
Nalor kane, ula synniang ruh T.3 lak kum ka jingiarap ia ka skul ba kan pynbit pynbiang iaki jingdonkam ka skul bad ki khynnah.
Lah ban kdew hangne, ka dei ka sien ba nyngkong ba baroh 3 tylli ki skul na Ri-Bhoi kin mihkhmat ia ka Jylla sha ka National level Subroto Cup 2024 ha Delhi bad ha Bangalore hadien ba kila ioh khur ia ka nam lahduh ha ka State level Subroto Cup.
Kine ki skul ki dei ka Mynken Christian Higher Secondary School ka ban mihkhmat ha ka U-17 ki shynrang, ka Nongjri Presbyterian Secondary School ha ka U-15 lem bad ka Christian Highe Secondary School ha ka U-17 ki kynthei.
