Shillong, Naitung 26 : Ka jingtei jong ka Iingdorbar Thaw Ain ba thymmai ka Meghalaya Legislative Assembly, kala shah ktah jur bha namar ka “jingbym don” ki nongtrei bylla.
U Lamphang ka Iingdorbar Thaw Ain Thomas A Sangma ha ka sngi Thohdieng ula ong “Nga la pyrshang ban pynthikna b aka jingiaid jong ka kam kan dei kaba biang bad nga la leit jurip hynnin ka sngi bad nga kmen ba ki kam kila iaid beit”.
“Hynrei, nga sngew ba ki jingjia ba dang shen (khynra mynder), katto katne naki nongbylla kila jah. Ngi la dei ha ka jingshisha ban don haduh 200 ngut ki nongtrei bylla hynrei nga la iohi ba ki don tang hapdeng 50-60 ngut. Kumta, kane kala ktah ia ka jingiaid sted jong ki kam” ula bynrap.
Haba kylli la ka jingkhynra jong ki Sengbhalang pyrshah ia ki nongbylla bar jylla ba khlem kot khlem sla kala ktah ia kane ka project ba kongsan ka Jylla, u Lamphang ula ong “Ngam tip bad ngam kwah ban ong eiei halor kane hynrei ki nongtrei bylla kila duna bha tangba ka kam kala iaid beit. Ha kane ka jingiaid ka kam ba mynta, ngam tharai ban gin lah ban pyndep ia ka project hapoh ka por bala buh”.
U Lamphang ula pyntip ba kumba 95-96 % na ki kam kila dep haba phai sha ka left wing bad ka right wing jong ka Building ba thymmai.
“Ka jingiaid ka kam ka biang hi bad namar ka aion slap, ym shym la lah ban pyniaid sted ia ka kam hynrei nga ngeit bad nga thikna ba ngin lah ban pyndep ia ka hadien bala dep pyndep ia ka Central Hall ba tap da ka dome bad kiei kiei baroh” ula ong.
Kat kum ka jingong jong u, haduh mynta kam pat shym la don ka jingpynheh ia ka mang pisa ha ka jingpynlut ia kane ka jingtei.
