Shillong, Rymphang 13: Ka National Spokesperson ka BJP ka Shazia Ilmi hynne ka sngi Thohdieng kala ong, ba ka Mang Tyngka 2026 kala pynkup bor ia ka Meghalaya ban ioh bun ia ka khajna, kaba la mang T.9,600 Klur ha ka Untied Fund na ka bynta ki kam pynroi ha ka jylla.
“Ka ai ia ka jylla ia ka jingiar bad ruh ia ka jingkitkhlieh” ong ka Ilmi bad ka bynrap “Kaba mut kumno kane ka T.9,600 Klur ia ki nongshong shnong ka Meghalaya? Ngi dang phaikhmat sha ka kam jngohkai kum ka lad ban kamai kajih baroh shisnem”.
Ka Ilmi kala banjur ban kyntiew ia ki lad ai jingshakri hapoh ka jingialam u Myntri Rangbahduh ka ri, da kaba ong, “Ka rukom ai jingshakri kala kylla long kaba biang bha bad kaba la lait na kino kino ki jinglaittuh”.
Kala pynpaw ruh ia ki projek kiba kongsan kiba ialam ia ka roi ka par, ka jingtei ia ka surok National Highway kaba 170 km ha ka jinglut kaba kot T.2,703 Klur ban kyntiew ia ka leit ka wan, ban tei 88 tylli ki surok ha nongkyndong (782 km) bad 55 tylli ki Jingkieng ban pyniasoh ia ki thain nongkyndong, ka jingbhah ban tei ia ka IT park ha Tura, West Garo Hills ban kyntiew ia ki jingtei Digital bad jingaikam, ka jingbei tyngka ia ka jingkieng Dhubri-Phulbari kaban long ka jingkieng kaba jrong ha ka ri India, ban wanrah ia ka jingkylla ban ioh ia ki iew ki hat, 2 tylli ki Swadesh Darpan Project kaba la mang T.184 Klur bad ban pyndonkam ha ka kam jngohkai bad ka jingkynshew tyngka ia ki jingtei ha ka kam jngohkai ha Umiam Lake, Tribal Rejuvenation Centres bad Water Sports, kiba la plie da u Myntri Rangbah ka Meghalaya.
Ka Ilmi kala ong, ba ka Mang Tyngka ka pyni ia ka jingkular skhem ka sorkar pdeng na ka bynta ban kyntiew ia ka roi ka par jong ka Meghalaya da kaba pynleit jingmut ha ka kam jngohkai bad ha ki jingtei ki bapher.
U MLC ka Bihar bad Convener jongka Budget Publicity Campaign for North East, u Devesh Kumar, ula ong, ba ka Mang Tyngka 2026 jong ka Sorkar Pdeng kadei kaba la btin lyngba ka nongrim ban pynthikna ba ki briew kiba khatduh eh kin ioh ia ki jingmyntoi na ki sienjam kiba la shim da ka sorkar.
U Kumar ula iaroh ia ki sienjam kiba la shim da u Myntri Rangbahduh ka ri kaba kynthup ia ka 5 Kg Ration Scheme bad ka pynpaw ba kala don ka jingkiew ha ka jingpynlut pynsep na ka T.3.08 Lak Klur ha u 2018-19 sha ka T.12.22 Lak Klur ha ka Mang Tyngka kaba mynta.
Ka Mang Tyngka ka pynleit jingmut ha ki 3 tylli ki bynta kiba kongsan, ban pynlong ia ka ri India kaba seisoh, ban kyntiew ia ka jinglah jong ki paitbah bad ban pynthikna ba kan don ka jingsam kaba ryngkat lang ia ki lad bad ki kabu ia baroh.
U Kumar ula pynpaw ba kala don ruh ka jingpynshlur ban kyntiew ia ka jingroi ki karkhana, ban pynmih ia ki lad ban aikam aijam, ka ioh ka kot kaba katkum kane ka juk kaba mynta bad ka jingmih ki kor teknoloji kum ka AI bad Biotechnology.
