Shillong,Nailar 13: Ka FGEM Higher Secondary School Nongspung ha ka 11 tarik mynta u bnai, kala pynkup burom iaki khynnah skul kiba la pass bha ha ka eksamin SSLC bad HSSLC 2022 kum ka dak ban ai mynsiem ia ki khynnah ba kin nang kiew ha ki kyrdan ba kham sha jrong.
Ha kane ka prokram la ia donlang u President ka KSU u Samla Lambokstarwel Marngar kum u Kongsan, u Pastor B.Marngar, u Principal jong ka skul u Bah Kyrshan Marngar, u Samla JF Nongsiang u President KSU WKH, ki Nonghikai, ki kmie ki kpa jongki khynnah skul.
U Bah Kyrshan Marngar u la ong, ba ka jingpass ki khynnah skul mynta u snem ka long 100% haka HSSLC bad 85% ha SSLC bad ula ainguh ia u Blei, ki Nonghikai kiba la aiti met bad mynsiem watla ki ioh iaka jingsiew kaba rit bad ula kyntu ia ki khynnah ba kidei ban trei shitom ba kin pass bha haki eksamin bapher.
U Samla Lambokstarwel Marngar, u la ong, ka jingdon kane ka Skul kala long ka jingmyntoi ia kane ka dong ka thain, hynrei kaba sngewsih ka long ba ka akor ka burom kala hiar arsut ha kine ki sngi bad mynta ki jingsniew ki sdang ban jop ia ki jingbha.
U la ong, donkam iaka shlem saindur naduh dangrit ha kaba ki Kmie ki Kpa ki Nonghikai ki don ka bynta kaba khraw bad hap ruh ban pyndonkam ia u dieng sympat ym ban pynmong pynmynsaw hynrei ban pynbeit ia ki khynnah ba kin long ka lawei iaka imlang ka sahlang.
U Nongialam ka KSU u la ong, ba ki khraw pyrkhat bunsien ki mih na ki nongkyndong namar katta ki khynnah ki donkam ban minot thop, jingkut jingmut, jingiaishah, ka jingpyrshang ban poi sha ka thong kumba ki kmie ki kpa ki angnud.
