Wat khuslai, ka Meghalaya kam pat kyrduh umphniang
Shillong, Nohprah 13: U Myntri Rangbah ka Jylla u Conrad K Sangma hynne ka sngi ula pynksan ba ki Pulit ka Jylla ki khlem pyndik iaki dkhot jong ka North East Petroleum Mazdoor Union (NEPMU) hynrei kila kem iaki ba donkti ban tuh iaka umphniang.
Haba jubab halor ka jingbyrngem ka NEPMU ban sangeh kit umphniang sha Meghalaya, u Conrad ula ong “Ka jingkynnoh ka NEPMU ba ki Pulit ki pyndik iaki dkhot ka long kaba khlem nongrim namar ki Pulit kila khynra bad kem tang ia kito kiba donkti ban tuh iaka umphniang ha shiteng lynti ka Ri-bhoi District hadien bala ioh jingujor na ki trai Petrol Pump”.
Ha kajuh ka pir, u Conrad ula ong ba ka jingai bah jamin ia ki dkhot ka NEPMU ka dei ka kam kaba hap leh da ka Iingkashari ym da ka Sorkar Jylla.
Kane kala mih ruh halor ka jingdawa ka NEPMU ban pyllait noh ia ki dkhot kiba shah kem haba byrngem ba lada ym pyllait, ka NEPMU ka lah ban pynsangeh ban pynpoi ia ki umphniang (petrol/diesel ) sha Meghalaya kaba sdang naduh hynnin ka sng.
U Conrad ula iathuh ba ki Pulit kila ioh jingujor naki trai Petrol Pump ba ka umphniang ka jah kumba 10%, 15% haduh 20% naki tnker hashuwa ban pynpoi sha ki Petrol Pump hapoh ka Jylla bad kane kala pynlong iaki Pulit ban pynlong ka jingkhynra bad ha kane ka jingkhynra la ioh kem iaki briew ba donkti ban tuh umphniang ha shiteng lynti.
Ula iathuh ruh baka Sorkar ka shim khia iaka jingujor ka seng NEPMU bad kala iakren ruh ban pynshisha halor ki sienjam ba ki Pulit kila shim pyrshah iaki ba tuh umphniang.
U Myntri Rangbah ula pynpaw ba kam pat don satia kano kano ka jingeh iaka Jylla haba iadei bad ka jingpynpoi ia ka umphniang petrol/diesel shapoh ka Jylla haba ong ruh ba ki paidbah kim dei ban khuslai ia kane.
“Nga kyntu iaki paidbah ba kim dei ban khuslai bad lada don shisha ka jingkyrduh umphniang ka Sorkar kan sa pyntip sha ki paidbah. Haduh mynta ka Jylla kam pat kyrduh umphniang bad ka Sorkar ka dang ia iakren bad ka NEPMU ban pynthikna ba ka jingpynpoi umkhniang sha Meghalaya kam dei ban thut” ula ong.
