Shillong, Kyllalyngkot 08: U Nongaiktien ka National People’s Party’s (NPP) bad Adviser ka tnad Pule Puthi ka sorkar Bah Himalaya M Shangpliang, hynne ka sngi Nyngkong ula pynshai ba ka jingshah weng kam ki ophisar jong ka Meghalaya Lokayukta kadei katkum ki kyndon aiñ jong ka Meghalaya Lokayukta Act, 2014.
Katei ka jingpynshai kala mih halor ka jingkynnoh jong ka seng Voice of the People’s Party (VPP) pyrshah ia ka jingshah weng kam ki ophisar ka Meghalaya Lokayukta, ia kaba la la kynnoh ba kadei namar ka jinglap ia ka kam bamsap hapoh ka Garo Hills Autonomous District Council (GHADC).
Ki Ophisar kiba la shah weng kam ki kynthup ia u Director of Inquiry and Prosecution u Bah J. Rymmai uba long u IPS ophisar barim ka jylla, ryngkat bad ki Enquiry-cum-Investigating Officers kiba kynthup ia u R. Pde bad u Anil K. Sangma.
Haba iakren bad ki nongthoh khubor u Bah Shangpliang ula pynshai ba katkum ka Section 10(2) bad 11 jongka Meghalaya Lokayukta Act, 2014, ki ophisar ne ki nongtrei ki dei ban mih na ki Tnad sorkar bad ki ophisar kiba la shongthait na ka kam kim lah satia ban long shibynta jongka Tnad.
Ula ong ba kitei ki ophisar kidei kiba la shongthait na ka ka tnad Home (Police) bad ka jingthungkam ka sorkar iaki ka long tang kaba shipor bad ula pyntip ba la thungkam ia u Director of Inquiry ha u Risaw 2022 bad ia ki Inquiry officers la thung ha u Lber 2023.
U Bah Shangpliang ula ong ba haba iaid katkum ki kyndon jong ka Meghalaya Lokayukta Act (Section 10 & 11), haba ka sorkar ka sngew donkam , kala phah ia ka thup jong ki kyrteng sha u Lokayukta ban jied ia ki ophisar bad ha ka 19 tarik u Nohprah 2023 ka ophis jong ka Meghalaya Lokayukta kala jied ia u Bah I.W. Ingty, IAS kum u Director of Inquiry & Prosecution, ryngkat bad 3 ngut ki ophisar MPS kiba kynthup ia u Chalang G Momin, John C Sangma bad u Bah Baniateilang Diengngan kum ki dkhot.
Ha kaba iadei bad ka jingkynnoh ba u Myntri Rangbah ka jylla u Conrad K. Sangma ula mushlia ha ka rukom treikam jong ka Lokayukta, u Nongaiktien ka NPP ula ong ba katei ka jingkynnoh ka long kaba bakla.
Ula pynshai ruh ba kam shym la don kano kano ka sien ba u Myntri Rangbah ne ka sorkar jylla kan tuklar ne mushlia halor ka kam ban jied ia ki ophisar jongka Meghalaya Lokayukta.
Katba ka Myntri ka Koit ka khiah ka Kong Ampareen Lyngdoh kala ong, ba ka Lokayukta kadei ka ophis treikam na ka bynta ki paidbah kiba don kano kano ka jingmudui pyrshah ia kano kano ka jingtreikam jong kino kino ki nongialam paidbah bad ki Ophisar bad ki paidbah kidei ban sngewthuh ba ka sorkar kam lah ban mushlia iaka jingtreikam jongka Lokayukta.
“Ka Lokayukta Act 2014 kala pynbna paidbah ban thung noh bran bran katkum ka jingpyniaid iaka riti synshar ka ri ia kata ka Meghalaya Lokayukta ne ka kynhun kaba la khmih ban thung ha man ki jylla katkum ki kyndon aiñ jong ki riti pyniaid jong ka ri India baroh kawei. Ka sorkar haba don kano kano ka jinhgdonkam ban pynbna ia ki dkhot ka Meghalaya Lokayukta, ka sorkar ka lah tang ban shu phah iaki kyrteng sha u Chairperson ne Chairman uba dei u khlieh jong kane ka kynhun mudui bad ka sorkar da lei lei ruh kan ym lah ba kan pynklumar ne pyartatien ia ka jingtreikam ka Lokayukta ha kane ka jylla jong ngi” ong ka Kong Ampareen.
Kala ong, hadien ba ka sorkar kala lap ba la thungkam da ki briew kiba la shongthait na ka kam, kala pyntip sha u Lokayukta uba don iaka bor kaba laitluid ban jied ia kita ki ophisar kiba dang trei ha ka kam sorkar katkum ki kyndon jong ka Act.
